Shillong, Naitung 27
Ka ïingbishar Meghalaya High Court kala bthah ïa ka Meghalaya State Pollution Control Board (MSPCB) ba kan aiti ïa ka kaiphod kaba pura halor ki lad ki lynti bala shim pyrshah ïa ki karkhana kiba pynjaboh ïa ka Byrnihat bad ki wah ha kylleng ka East Jaiñtia Hills, haba pynpaw ba ka affidavit bala aiti nyngkong kam don satia ïa ki jingtip kiba kongsan.
Haba shong bishar ïa ka PIL ha ka 23 tarik Naitung, ka bench jong ka Chief Justice Revati Mohite Dere bad Justice W Diengdoh kala pynpaw ba ka affidavit bala file da ka MSPCB ha ka 22 tarik Naitung kam shym la ai ïa ki jingtip halor ki jingpynshitom pyrshah ïa ki karkhana ha Byrnihat, kynthup kito kiba pynjaboh ïa ka wah Umtrew.
Ka ïingbishar kala bthah ïa ka MSPCB ba kan ai ïa ka affidavit kaba bniah bad pura kaba batai bniah ruh ïa ki kam bala leh halor kawei pa kawei ka jingai jingmut jong ka NEERI.
Kala pan ruh ïa ka kaiphod ba ïaid katkum ka hukum ka ïingbishar Supreme Court ha ka mukotduma Delhi Pollution Control Committee vs Lodhi Property Co. Ltd. (2026) 2 SCC 670.
La bthah ruh ïa ka MSPCB ba kan aiti ïa ka kaiphod halor ka jingpynjaboh ïa ki 7 tylli ki wah ha East Jaiñtia Hills: ka wah Waikhyrwi ha Sutnga, Thwai Kungor ha Bapung, Rawaka, Kmai-um, Metyngka Stream ha Rymbai, Ummynkseh ha Lad Rymbai, bad Umkyrpong ha Khliehriat.
Ka ïingbishar kala pynpaw ba kine ki wah ki dei kiba la dep ban wad bniah da ka MBDA bad kiwei ki Institute.
U AAG K. Khan u la aiti ïa ka affidavit ka tnad ka Koit ka Khiah ba pyntip bala dep mang ban pynlong ki 12 tylli ki jingwad bniah halor ka “Association between Ambient Air Pollution and Respiratory Symptoms in Meghalaya”. Ka bynta ba nyngkong kan long ïa ka Byrnihat ha Ri-Bhoi.
La pyntip ïa ka ïingbishar ba ka Byrnihat PHC kala sumar ïa bun ngut ki nongpang ba jynjar ring mynsiem hynrei ym shym don satia ki Radiologist. Ïa ki x-ray la hap ban phah sha Nongpoh Civil Hospital.
“Haba pyrkhat ïa ka jingdon bun ki nongpang ba jynjar ring mynsiem ha Byrnihat, ngi kyntu ïa ka tnad ka Koit ka Khiah ban pyrkhat la ka lah ban phah ïa ki Radiologist laisien ha ka shitaïew sha ka PHC,” pynpaw ka ïingbishar.
La bthah ruh ïa u AAG ban pyntip ïa ka ïingbishar halor ki lynti bala shim da ka PWD bad ka MIDC ban shna ïa ka surok ha ka Byrnihat Industrial Belt katkum ka jingai jingmut ka NEERI, bad ki sienjam da ka tnad Transport ban tehlakam ïa ka jingpynmih tdem ki trok.
La bthah ruh ïa ka CPCB ba kan file ïa ka affidavit ha ka jingïatreilang bad ka Assam Pollution Control Board namar shibynta jong ka Byrnihat ka hap sha Assam. U ophisar rangbah ka CPCB u dei ban ïashimbynta lyngba ki durkhih ha ka sien shong bishar ban wan.
Ka ïingbishar kala thung ïa u Advocate Philemon Nongbri kum u Amicus Curiae, ryngkat Advocate R Pahsyntiew bad DS Pajat ba kin ïarap. La bthah ïa u Amicus bad Secretary ka DLSA, Ri-Bhoi ba kin leit jngoh ïa ka Byrnihat bad ka PHC bad ban aiti ïa ka kaiphod.
Ïa kane ka kam la buh ban bishar biang ha ka 10 tarik Nailar, 2026.
