Shillong, Naitung 27
Ka Kynhun Myntri ka Jylla ha ka Lah Sngi U Blei ka la mynjur T.22.7 klur na ka bynta ka bai jaka kaba donkam ban pynïaid ïa u laiñ bording uba 132 KV bad uba jrong 6.5 km, ha Mawkhanu, New Shillong Township.
Ïa kane ka rai la shim ha ka jingïalang jong ka Kynhun Myntri ba la pynïaid da u Myntri Rangbah ka Jylla, u Conrad K. Sangma.
Haba kren sha ki lad pathai khubor hadien ba la wai ka jingïalang, u Myntri Sorkar, u Marcuise N. Marak u la ong ba une u laiñ pynpoi bording un pynïasoh ïa ka ‘Substation’ 220/132 KV kaba la don lypa bad ka ‘Substation’ (ba la tyrwa) ha Mawkhanu kaba 132/33 KV, 2×50 MVA.
“Une u laiñ u don ïa ka jingjrong kumba 6.5 km uba la tan sha ka ‘Substation’ Mawkhanu. Na ka bynta kane, ka Sorkar kan hap ban shim katto-katne ki jaka, bad ka Kynhun Myntri ka la dep mynjur lypa ïa ka jingsiew bai lutksan,” ong u Marak.
U la ong ba ïa ka pisa ba la mynjur kaba long T.22.7 klur yn pyndonkam ban siew bai jaka sha ki trai ha shilynter katei ka jaka. Na ka liang u Myntri, u la pynshai ruh ba ha kaba ïadei bad ki projek pynpoi bording, ïa ka jaka kaba ka tnad ka pyndonkam la khot kum ka ‘Right of Way’.
