Shillong, Naitung 27
Ka kynhun jong ki nongshet ja skul kiba hapoh ka Union of Cook Cum-helper PM POSHAN (Mid-Day Meal) ki la pynpaw ba ka kynta ba ki trei bad ka jingsiew kaba ki ïoh ka long ka bym ïahap shuh bad ka jingsiew kaba ki ïoh.
Haba ïakren ïa ka Kong Gina Nengnong kaba long ka State President ka Union ka la pynpaw ba ki lut por kumba 6 kynta ban pynbit pynbiang ïa ka bam jong ki khynnah skul kiba hapoh ka kyrdan Lower Primary bad Upper Primary School.
Ka la ïathuh ba ha Nongkwar Presbyterian Secondary School ki don haduh 286 ngut ki khynnah kiba dei ban ïoh ïa ka ja sngi ha skul bad ban pynbiang ïa ka bam jong ki katkum ka jingbthah na ka Sorkar ka long kaba la shimpor bha ïa ki ban pyndep.
Ka la pynpaw ba ka jingdawa jong ki ïa ka Sorkar Pdeng ka long beit halor ka bhah ba ki ïoh na ka Sorkar Pdeng kaba ki ïoh mynta la kumba arphew snem tam tang ha ka dor T.900 shi bnai ban pynkiew noh sha ka T.9000 shi bnai.
Haba jubab ïa ki jingkylli, ka Kong Gina ka la kdew ba kiwei ki Jylla ki la ïoh ha ka dor kaba kham heh kum ha Kerala ki ïoh T. 12,000 shi bnai, ha Delhi ki ïoh T. 8000 ha ka shibnai, Kumta ka la kyntu ïa u Myntri Rangbahduh ka Ri ba un sngew un sngap ïa ka jingdawa jong ki nongshet ja skul ha ka Ri ba kin lah ban ai ka jingshakri kaba bha ïa ki khynnah ha ki skul.
Ha ki khyndiat sngi ba la dep ki nongshet ja skul ki la pynpaw ba lada ka Sorkar kam pynkiew ïa ka jingsiew, ka la bha ïa ka Sorkar ba kan pynkut noh ïa kane ka Skhim.
Haba ïadei bad kane la ïoh ban ïakren ïa u Babu P. K Rapsang u ba long u Vice Principal ka Nongkwar Presbyterian Secondary School uba la pynpaw ba lada ka Sorkar kam sngap ïa ka jingdawa jong ki nongshet ja skul, kin sangeh treikam bad kan long ka jingduhnong kaba khraw ïa ki skul bad ki khynnah skul.
Shuh-shuh u la pynpaw ba bun ki khynnah skul kiba wan na ki longïing long em kiba duna ka ïoh ka kot, ka long ka jingmyntoi namar ha skul ki la ïoh ka bam bad ki kmie ki kpa ki kham sting ban pyndap ïa ka jingdonkam ki khynnah ha skul, hynrei lada kane ka skhim ka kut noh kan ktah ïa ki bad ka lah ban kiew ka jingpep skul bym pat dei por ki khynnah ha ka Jylla.
