Shillong, Nailar 13
Ka kynhun na ki 3 seng hapoh ka shnat treikam jong ka Mawlai Circle ba kynthup ïa ka KSU, FKJGP bad HNYF ha ka Sngi Ba-ar ka la pynlong ïa ka jingwah lama ïong ne ka ‘Black Flag Day’ kum shi bynta ban kynmaw burom ïa ka lyngkhuh sngi khlad kaba 3 snem jong u nongïalam barim ka Hynñiewtrep National Liberation Council (HNLC), Bah Cherishstarfield Thangkhiew uba la shah siat ïap ha ki pulit hapoh ïingsah jong u ha Mawlai Kynton Massar ha u snem 2021.
Ha kane ka sngi, la sakhi ïa ki dkhot jong ki 3 seng kiba la ïashim bynta shit rhem ban wah ïa ki lama ïong ha ki kali bad ar-shaka kiba ïaid lynti ha surok ka Mawlai Petrol Pump bad Mawlai Stand Bus.
Nalor ka jingwah ïa ki lama ïong, ki dkhot ki la wah ruh ïa ki ‘Banner’ kiba thoh ïa ki kyntien pynrem haba ïadei bad katei ka jingjia kaba la jia 3 snem mynshuwa kum ka “Khasi Lives Matter”, “U Kuli Sorkar u treikam tyngeh tang na bynta kiba dawa ïa ka hok u Khasi”, “Ngi kwah ïa ka jingbishar kaba hok” nalor kiwei-kiwei.
“Ngi la shim ïa kane ka bynta ban pynlong da ka jingwah ïa ki lama ïong ha ryngkat ki ‘Flex’ ban kynmaw ïa ka lyngkhuh sngi ïap ha kaba une u rangbah u la shah dkhat noh la ka jingim ha ïingsah kaba ha Mawlai Kynton Massar,” la ong u President ka KSU Mawlai Circle, samla Biangbor L. Paliar haba kren sha ki lad pathai khubor.
Haba pynpaw ba kane ka sngi ka long ka sngi kaba sngewsih ym tang ïa ka shnong Mawlai hynrei ïa ka jaidbynriew baroh kawei, u la ong ba kum ka kynhun ka sngewthuh ba kane ka jingshah leh donbor pyrshah ïa une u rangbah – shah bthat jubor la ka jingim, haduh kane ka khyllipmat kam pat don kano-kano ka jingïoh ïa ka jingbishar kaba hok.
“Kum ki kynhun seng bad kum ka jaidbynriew hi baroh kawei, ngi ïai pynkynmaw na ka por sha ka por ba kum kine ki jingjia kim dei ban jia shuh hadien-habud ïa uno-uno u dkhot jong ka ri bad ka jaidbynriew,” u la ong.
Haba kylli, u la ïathuh ba katkum ki kaiphod, la ïohi ba ki don shibun ki jingbakla na ka liang ka tnad pulit bad dei kane ka daw kaba pynlong ïa ki 3 seng ban mih biang shakhmat ha kane ka sngi.
“Ngi ïohi ba kine ki ‘riew thrang snam – kine ki briew kiba don bynta ha ka ban leit pynïap ïa u Bah Cherishstarfied Thangkhiew ki dang ïoh ïaid laitluid haduh mynta bad ngim pat ïohi ba kan don ka jingpynshitom ne ban weng kam ïa kine ki briew haduh mynta,” u la ong.
U la bynrap ba ka kynhun ka ïai dawa na ka Sorkar ban pynshitom ïa kine ki briew kiba donkti ha kane ka kam.
Na ka liang u President ka FKJGP Mawlai Circle, samla Khrawkupar Nongsiej u la ong ba ka jingwah ïa ki lama ïong ka long kum shi bynta ban pynpaw sha ka pyrthei ba “ngi dang kynmaw ïa ka jingshah shim jyndat noh ïa ka jingim jong u Bah Cherishstarfield Thangkhiew ha ki pulit jong ka Jylla”.
“Kane ka sngi kan pynkynmaw ïa ki paidbah jong ka jaidbynriew khnang ban pynïoh pat ïa ka jingbishar kaba hok na bynta u Bah Cherish kumjuh ka ïing ka sem jong u,” u la ong.
Shuh shuh u la bynrap, “Nga ngeit ba ka aiñ kam ju peit shiliang khmat ïano-ïano bad nga ngeit ba u Bah Cherish lem bad ka ïing ka sem kin ïoh ïa ka jingbishar kaba hok.”
