Shillong, Nailar 13
Uwei u nongtrei jong ka Meghalaya Assembly u la khlad ha ka jaka shong ha ka jaka trei bad la suba jur ba ka jingïap ka lah ban dei na ka jingpyndonkam palat ïa u drok da kaba injek.
Ïa une u nongtrei la tip kyrteng kum u Lachuman Shrestha, uba trei kum u chowkidar jong ka Assembly. La lap nyngkong da ki nongtrei kane ka shlem treikam ha ka step jong ka Sngi Ba-ar.
Na ka liang jong ki nongtrei hadien ba ki la lap, mar-mar ki la pyntip noh sha ki pulit kiba la wan poi sha kane ka jaka ban pynlong ka jingtohkit bad leh ïa kaba donkam.
Ha ka jingtohkit, ki pulit ki la lap ba une u nongtrei ka Assembly u la shong ïap ha kawei ka shuki treikam jong kane shlem treikam bad la lap ruh ïa u thyrnia uba dang sahkut ha ka bynta jong ka kti kamon, bad ruh ïa u drok uba don halor ka miej treikam kaba don ha kane ka jaka.
Kumta ha kaba ïadei bad kane ka jingjia, ki pulit ki la suba jur ba une u nongtrei imat u la ïap na ka jingpyndonkam drok palat (overdose) hynrei ka jingtohkit mynta ka dang ïaid shakhmat ban tip ïa ki jingshisha.
Hadien ba la dep ban tohkit, ïa ka metïap jong une u briew la pynkit noh sha Civil Hospital Shillong na ka bynta ban pyndep ïa ka ‘post mortem’.
