Shillong, Nailar 13
Kum ka dak ïa ka jingkynmaw tympang ïa ka lyngkhuh sngi khlad kaba 3 jong u Bah Cherishstarfield Thangkhiew uba dei u General Secretary barim ka Hynñiewtrep National Liberation Council (HNLC), uba la shah siat ïap ha ki ktang suloi jong ki pulit ka Jylla ha ka 13 tarik u Nailar 2021, na ka liang ka ïing ka sem, ki sengbhalang bad ki ‘riew paidbah ki la mih ryntih shriak ban leit buh syntiew ha u lum jingtep jong u Bah Che ha ka Sngi Ba-ar jong ka 13 tarik u Nailar 2024 kaba don ha Lawmali.
Ha katei ka sngi la synran ïa ki bahaïing bahasem jong u Bah Che da ki sengbhalang kiba kynthup ïa ka Khasi Students’ Union (KSU), ka Federation of Khasi Jaiñtia and Garo People (FKJGP), ka Hynñiewtrep National Youth Front (HNYF), ka Sur Ka Bri U Hynñiewtrep, ka Seng Samla Mawlai Pyllun, ka Hynñiewtrep Youths’ Council (HYC) nalor kiwei-kiwei.
La don bynta lang ruh ha kane ka sngi da u Vice Chairman barim ka HNLC, u Bah Manbhalang Jyrwa.
Ha shwa ban pynlong ïa ka jingbuh syntiew da ki bahaing bahasem, ki sengbhalang bad ki ‘riew paidbah ka la don ka jingsngap jar kaba shi minit kum ka dak ban kynmaw burom ïa u Bah Che.
Haba ai jingkren ha ka jingïalang lyngkot ha kane ka sngi, na ka liang u President ka HNYF sengkmie bad kum u ksiang ka HNLC ban ïakren ïasuk hapdeng ka HNLC bad ka Sorkar, u Bah Sadon K. Blah, u la ong ba wat lada ka por ka la ïaid hynrei kum uwei na ki paralok uba ïajan bha bad u Bah Che, u sngew ba ka jingsawa jong ki ktang suloi kaba ki lehnoh Sorkar ki la bthat ïa ka jingim jong u Bah Che khlem dei por ka dang ïai sawa haduh kine ki sngi kiba mynta. U la ong ruh katba kine ki jingsawa ki dang sawa ha ki kyndong shkor, ka dang dei ka jingai mynsiem ïa ki samla jong ka Ri bad ka Jaitbynriew ban bud ïa ka lynti kaba u Bah Che u la ïalam ha baroh shilynter ka jingim jong u haduh ba un da khlad noh na kane ka sla pyrthei.
“Kane ka sngi ka pynkynmaw ruh ïa ngi ba ka jingshah kynnoh lehnoh kam dei kaba la kynnoh tang ïa u ‘riewpaidbah u bym sngew ïahap ïa ka rukom shah synshar donbor bad thombor hynrei kane ka sngi ka pynkynmaw ruh ïa ngi ba wat ki bor Sorkar ruh ki don hi ban leh ïa ka kam lehnoh bad ka jingshah dkhat noh jubor ka jingim i Bah Che ha ki ktang suloi jong ki lehnoh Sorkar, ka pynshisha ba ka Sorkar Meghalaya jong ngi hateng-hateng ka pyndonkam ïa kata kaba ngi ong ka ‘State Terrorism”, la ong u Bah Sadon.
Na ka liang u Bah Thomas Passah uba dei uwei na ki nongïalam jong ka Sur Ka Bri U Hynñiewtrep, u la ong ba kum ki sengbhalang bad ki ‘riewpaidbah kin ïai don ryngkat bad ka ïing ka sem u Bah Che ha ki sngi bad ki por ban dang wan da ka jingkyrmen ba ha kawei ka sngi, ka ïing ka sem u Bah Che kan sa ïoh ïa ka jingbishar kaba hok.
Na ka liang u Bah Biangbor Paliar, President ka KSU Mawlai Circle, u la ong ba ka jingshim jubor jong ka Sorkar ïa ka jingim u Bah Che ka pynpaw shai ba ka don ka jingïai thombor na ka por sha ka por da ka Sorkar ïa ki paid ka Bri U Hynñiewtrep.
“Ki ‘riewkhraw ki lah ban leit bad phi lah ban shim ïa ki ‘riewkhraw hynrei ka hok kan nym jah lano-lano ruh na kane ka sla pyrthei. Haba ngi ïeng hangne ha u lum jingtep jong i Bah Che, ka pynkynmaw ïa ngi sa shisien pat ba ngi lah ban tep ïa ka met jong i hynrei ïa ka mynsiem ba shynrang bad ïa ka nongrim jong i, kan ïai risa ha ngi ki khun samla iwei-pa-iwei”, la ong u Bah Biangbor.
