Shillong, Nailar 13
U Bah Granarysterfield Thangkhiew uba dei u para trai jong u Bah Cherishstarfield Thangkhiew, General Secretary barim ka Hynñiewtrep National Liberation Council (HNLC) u la phla ha ka lyngkhuh sngi khlad dap 3 snem jong u Bah Che kaba la long ha ka 13 tarik u Nailar 2024, ba nalor jong uwei u pulit uba la donkti ban siat ïap ïa u Bah Che ha ka 13 tarik u Nailar 2021 ha ka ïingsah ha Kynton Massar, ki la don sa ar ngut kiwei pat ki pulit kiba la dep ban byrngem-byrsit lypa ïa u Bah Che shwa ka ar-taïew ba kan jia shisha ka jingsiat ïap.
Haba ai jingkren ha ka jingïalang ba lyngkot hajan u Lum Jingtep jong u Bah Che kaba don ha Lawmali, u Bah Granary u la kyntu ïa kitei ar ngut pulit kiba la byrngem byrsit ïa u hynmen jong u ba kin mih shakhmat ban wan pynshai balei ki la byrngem ban pynïap ïa u hynmen jong u ar-taïew hashwa ba kan jia shisha ka jingjia siat ïap da kaba ki la ong ba kin pynïap ïa u Bah Che tang hapoh ka ar-taïew bad kane ka la urlong shisha.
“Ki dang don sa ar ngut ki pulit kiba la dep ban byrngem lypa ïa i shwa ka ar-taïew ban khlad ma i. Nga kyrpad ïa ki ba kin mih shakhmat ban pynshai bad ban wan sha ngi ka ïing ka sem, ngim sngeweiei bad ngim leh eiei ïa phi hynrei wan ban pynshai balei phi byrngem ban pynïap ïa u hynmen jong nga ar-taïew shwa ban jia kane ka jingjia. Nga tip ïa ka kyrteng jong phi baroh ar ngut, sngewbha wan shakhmat ban pynshai khnang ba ngin sngewthuh lym kumta ngim tip kaei ka ban jia namar ngi ruh ngim lah ban bahkhlieh”, la ong u Bah Granary.
U Bah Granary u la ong ba u pulit uba la siat ïap ïa u Bah Che u dei u Khasi bad ar ngut kiba la byrngem ïa u Bah Che shwa ka ar-taïew ruh ki dei ki Khasi hi.
U la ong ba kum ka ïing ka sem ka kyntu ïa kine lai ngut ki pulit kiba la don bynta ban leh ïa kane ka kam lehnoh ba kin wan pynshai ba mano ba la ai hukum ïa ki ban siat ïap ïa u Bah Che bad na kaei ka daw la wan siat ïap ïa u namar haduh mynta kum ka ïing ka sem ka dang sah ha ka umdum.
