Nongstoiñ, Nailur 13
Ka seng Nongkhaïi Shyiap bad Maw jong ka West Khasi Hills ha ka Sngi Ba-ar jong ka taïew da kawei ka jingmut ki la shim ïa ka rai ba kum ki nongkhaïi shyiap bad maw kin khat shyiap beit, tih maw beit bad kin nym pdiang ai ‘Challan’.
Kane ka sur jong katei ka kynhun ka la mih ha ka jingïalang kaba la pynlong da ka seng ki nongkhaïi shyiap maw jong ka West Khasi Hills ba kynthup naduh ki kali kit nong, ki trai kali, ki nongbylla, ki trai par maw kumjuh ki trai par shyiap kaba la long ha katei ka sngi ha Bishop Hall Nongstoiñ.
Ka jingthmu jong kane ka jingïalang ka dei hadien ba ka sorkar ka la khang noh ïa ka jingkhat shyiap tih maw. Kumta ha kane ka sngi da kawei ka sur u paidbah ha ryngkat ki nongïalam ki la rai da kawei ka jingmut ban rah noh da ka dorkhas sha ka sorkar ba ka dei ban shna aiñ ban ïada ïa ki ym ban pynïap.
Shuh shuh ha kane ka sngi, la ïoh ruh ïa ka jingkren lyngkot na u Bah Mosklandar Marngar, uba long u nongaibuit ka seng ki nongkhaïi shyiap maw, na u Bah Egenstar Kurkalang, President ka Truck Owner and Driver’s Association, u Bah Diswelroy Kharkongor na ka Stone Crusher Owner Quary Owner and Workers Association bad na u Bah Mawkordor Kharsyiemlieh, General Secretary ka seng ki nongkhaïi shyiap maw.
