Jowai, Nailar:
U Symbud Myntri Rangbah ka Jylla u Bah Sniawbhalang Dhar u la pynbna ba la dep mang T.25 klur na ka bynta ban tei pynbha ïa ka ‘Tre pyrda’ ne ka Aitnar ka Seiñraij Ïalong kumjuh ki kam pynroi bapher bapher hapoh ka shnong Ïalong.
Ïa kane u Bah Sniawbhalang Dhar u la pynbna haba wan kyrkhu-kyrdoh ïa ki khun ka Seiñraij Ïalong ha ka sngi pynkut jong ka lehniam Behdeiñkhlam ha ka 12 tarik Nailar.
Ka lehniam Behdeiñkhlam jong ka Seiñraij Ïalong ka sdang da ki jinglehniam bapher bapher ba la pyndep da u Langdoh ryngkat ki Wasan, ki Maji bad u Sangot. Ka Behdieñkhlam Ïalong la shimbynta da ki lai shnong, kata Wahïajer, Nongkhyllep bad ka Ïalong.
Ki jinglehniam ki kynthup naduh ka Khrong ka Khri, ka Choh Thyndai bad ka Knia Khlam ban beh ïa ka pang ka shitom bad ïa ka sih ka roi na ki shnong ki thaw bad ban kyrpad kyrpon ïa u nongbuh nongthaw ban kyrkhu kyrdoh ban bha ka rep ka riang.
Ha ka sngi pynkut, ki khun ka Seiñraij Ïalong na kylleng ki dong bapher bapher kumjuh ka shnong Wahïajer ki pynpoi haduh 12 tylli ki rot ha pung kyntang kaba la tip kum ka ‘Pyrda’ ha ka jingïalang kaba la pynïaid da u President ka Seiñraij Ïalong u Bah Pyrkhat Shylla.
Nalor u Bah Sniawbhalang Dhar la donlang ruh u Dolloi ka Elaka Jowai Bah Puramon Kynjing, u MLA barim ka Sutnga Saipung Bah Shitlang Pale, u President ka Seiñraij Jowai, u Bah H. Toi, nalor kiwei kiwei.
Katba ïa ka Knia Khlam bad ka Wahbhang kiba dei ki lehniam ba khadduh la pyndep hadien ka jingbret ïa ki rot.
