Shillong, Nailar 13
Ki paid Khasi kiba sah ha ki jaka khappud bad ka Bangladesh ki don ka jingsngew syier khamtam ha kito ki jaka bym pat ker sainar shiah wat lada ym pat don kano-kano ka jingpyrshang ban wan rung beaiñ sha India da ki briew kiba sah ha Bangladesh kiba mad ïa ka jingshah thombor.
Na ka liang ki shipai BSF ki la peitngor bad pahara baroh 24 kynta ha kito ki jaka kiba khlem pat ker sainar shiah namar ha Khasi Jaiñtia sector ka Meghalaya, ki dang don katto katne ki jaka kiba khlem pat lah ban ker sainar shiah lut.
Ka daw halor kane ka dei ka jingshlem ban ïoh ïa ka jaka ban shna ïa ka jingker.
La ïathuh ba ki jaka kiba khlem pat ker sainar shiah ki dang don sa kumba 35 km ha Khasi Jaiñtia sector na Jaliakhola sha Dawki.
Ka jingker sainar shiah kaba ym pat lah ban pyndep lut ha Khasi Jaiñtia sector ka kynthup ïa ki jaka ha Muktaour, Naljuri, Lyngkhong, Lyngkhat, Hat Thymmai, Pyrdiwah, Dawki nalor kiwei kiwei.
Kiba shong ba sah ha ki shnong khappud ki la kubur ba ka jingdon ka jingker sainar shiah ka kham ai jingshngaiñ namarba lada don na Bangladesh kiba thmu ban wanrung beaiñ sha India ruh kam long kaba suk ïa ki khamtam haba la pahara ki shipai BSF.
Ki la ong ba wat lada ym pat don ka jingpyrshang ban wanrung jubor sha India ha kine ki jaka kiba hap Khasi Jaiñtia sector ka Meghalaya, hynrei la ïohi ba ha kiwei pat ki jaka khappud hapdeng ka Jylla West Bengal bad ka Bangladesh ka la don ka jingpyrshang ki briew ban phet noh na Bangladesh ban wan sha India namar ka jingkynnoh ba la shah lehbeiñ ki ritpaid ha ki heh paid.
