Shillong, Risaw 11
Khatar snem hadien ka jingkhang tih dewïong jong ka NGT ha Meghalaya, ka Jylla mynta ka la nang jam suki-suki ban sdang biang ïa ka kam ha ryngkat ka jingbud ryntih ïa ki kyndon.
Ka ‘High-Level Technical Team’ jong ka tnad kam dewïong ka Sorkar Pdeng, ha ryngkat ki ophisar ka CMPDIL bad ka DGMS, ki la jurip ïa ki jaka ba don dewïong ha East Jaiñtia Hills bad Ri-lum Khasi ha ka taïew ba la dep, la pyntip ka Directorate of Mineral Resources ha ka Sngi Saitjaiñ.
Ha kane ka jingleit jurip la ïarap lang da ka State Directorate bad ka dei ruh shi bynta jong ki jingïakren kiba ïai bteng hapdeng ka Shillong bad ka Delhi ban pyntreikam ïa ka jingtih par ba-rit katkum ka juk stad saian.
Kane ka jingshimkhia ka la long hadien ba u Myntri Rangbah ka Jylla, u Conrad K. Sangma u la ïakynduh ïa u Myntri ka tnad ki kam Dewïong ka Sorkar Pdeng, u G. Kishan Reddy ha New Delhi ha ka 7 tarik Naitung bad pynpaw ïa ka jingeh jong ki longïing kiba shaniah ha u dewïong – kiba ka lad kamai jong ki ka la shah ktah naduh ba la khang ïa u dewïong ha u snem 2014.
Ha kine ki jingleit jurip ïa ki jaka, kane ka kynhun ka Sorkar Pdeng ka la pule bniah ïa ki rukom tih par kiba la don lypa bad khmih bniah ruh la lah ne em ban sdang biang ïa ki kam da ka jingshngaiñ bad ka ban neh hapoh ka saiñdur jong ka aiñ.
Hadien kata, ha ka jingïalang bad ki heh ophisar jong ka Jylla, ka kynhun ka la ïakren halor ki jingeh kiba ïakynduh da ki nongtih par trai-ri bad kaei kata ka rukom tih par kaba kyrpang katkum ka juk stad saian ka ban donkam na ka bynta ka Meghalaya – da kaba kheiñ ïa ka jinglong-jingman jaka ka bym shong skhem jong ka Jylla bad ka jinglong trai jong ka imlang-sahlang ïa ka khyndew ka shyiap.
Haba pynkynmaw biang ïa ka nongrim jong ka Sorkar jong u, u Myntri Rangbah ka Jylla, u Conrad K. Sangma u la ong, “Ka Sorkar jong ngi ka kular ban wad ïa ki lad ki lynti kiba lah ban sdang biang ïa ka jingtih dewïong ha Meghalaya, da kaba pynïabiang tara ïa ka jingkiew ha ka ïoh ka kot bad ka jingkitkhlieh ïa ka mariang. Da kaba ïatreilang bad ka tnad dewïong ka Sorkar Pdeng bad ki nongtih par ha ka thaiñ, ngi lah ban thaw ïa ka rukom treikam kaba pyntikna ïa ka jingïaineh, kaba shngaiñ bad ki jingtreikam jong ka jingtih par katkum ka juk stad saian.”
Nalor kane, ka Sorkar ka la ong ba la khmih lynti shuh-shuh ïa ki jingkhmih bniah bad ki jingïamir jingmut ha ki taïew ban wan namarba ka Directorate of Mineral Resources ka ïai bteng ban ïatreilang bad ka Sorkar Pdeng ban ïaid shakhmat bad kane ka kam.
