Khliehriat/Jowai, Risaw 11
U Chief Electoral Officer (CEO) ka Meghalaya u Dr. BDR. Tiwari, IAS ha ka 9 tarik Risaw u la hiar sha ki artylli District, ka East Jaiñtia bad West Jaiñtia Hills District ban bishar bniah ïa ka jingpynlong ïa ka Special Intensive Revision (SIR) 2026 jong ka Electoral roll.
Ha West Jaiñtia Hills District ïa ka jingïalang la pynlong ha Conference Hall ka DC ophis ha ka jingdonlang u Deputy Commissioner Abhinav Kumar Singh, IAS, ka Sub Divisional Officer, Amlarem Sub Division ka Vevotolu Kezo, IAS, ka Additional Deputy Commissioner Kong DV Lyngdoh MCS, nalor kiwei.
U Dr. BDR Tiwari, IAS haba kren sha ki lad pathai khubor u la ai ka jingïaroh ïa ka tnad pynïaid Election jong ka West Jaiñtia Hills District halor ka jingpyntyllun bad pynïaid janai ïa ka kam ha ka rukom kaba dei.
U Dr. Tiwari u la pyntip ba kumba 63 hajar tylli ki notice ne jingpynbna la phah sha ki nongthep vote bym paw kyrteng bad kiba don jingbakla, bad kumba 80% la shem ba ki don kiba jah, kiba la kynriah jaka sah, kiba la khlad noh bad ki duplicate elector.
U CEO u la kdew ba ka West Jaiñtia kam shym la ïoh kano kano ka jingujor haduh mynta. U la pynshong nongrim ïa ka jingkiew ha ka jingsngewthuh jong ka tnad pynïaid ilekshon ka District ïa ki rukom treikam ba la buh, bad ka jingïatreilang kaba jan bad ki paidbah.
Haba pynksan ïa ka jingdonkam ban ïada ïa ka hok jong ki nongthep vote kiba dei hok, u CEO u la bthah ïa ki sahep Sorkar ban pynthikna ban ym kyntait ïa ki aplikeshon tang namar ba ym shym la aiti ïa ki katto katne ki kot ki sla kiba kyrshan.
U la ai jingmut ïa ka tnad pynïaid Election ka district ban pynbeit ïa ki jingleit jurip jong ki Booth Level Officer (BLO) ha kano kano ka jaka ba donkam, ban ïarap ïa ki nongthep vote ban aiti ïa ki kot ki sla kiba donkam shwa ban shim ïa ki rai halor ki kam jong ki.
Shuh shuh u Dr. Tiwari u la ïaroh ruh ïa ka jingtreilang ka tnad elekshon hapoh ka jingïalam jong u Deputy Commissioner, khamtam eh ïa ki BLO, kiba trei ha madan, ryngkat bad ki BLO Supervisor, ki Assistant Electoral Registration Officer (AERO), Electoral Registration Officers (ERO).
U la ai khublei ruh ïa ka jingkyrshan ba la ai da ki Dorbar Shnong, ki seng saiñpyrthei bad ki Booth Level Agent (BLA) jong ki bad kumjuh ruh ki lad pathai khubor, da kaba kdew ba ka jingïatreilang jong ki, ka la noh synñiang shibun ha ka jingïaid shaphrang jong ka jingpynlong ïa ka SIR.
Katba ha East Jaiñtia Hills, u Dr. BDR Tiwari, IAS, u la ban jur ban pynleit jingmut ha kaba pynshisha ïa ki electoral record katba dang ïada ïa ka hok thep vote jong baroh ki nongshong shnong kiba dei hok.
U la kren ruh ïa ka jingdonkam ban pyrkhat ïa ki kot ki sla jingkyrshan, kynthup ïa ki kot ki sla ba la pynshisha jong ka longïing bad ki kot pynshisha na ki waheh shnong ha kano kano ka jaka kaba donkam.
Ha ka jingïalang la pynshai shuh shuh ba ki briew kiba dei hok kiba kwah ban pynrung kyrteng ha ka thup nongthep vote ki dei ban ai ïa ka aplikeshon lyngba ka Form 6, kumba la bthah da ka Election Commission of India.
La ïakren ruh ïa ki jingeh kiba ïadei bad ka jingkit jingbah jong ki Booth Level Officer (BLO), kiba bun na ki, ki dei ruh ki nonghikai.
U CEO u la kyntu ïa ki sahep jong ka tnad Election bad ki nongmihkhmat saiñ pyrthei ban ïatreilang, ban weng ïa ki jingeh ba la pynpaw da ki nongthep vote bad ban pynthikna ba ïa ka rukom pynkylla thymmai yn ïaid katkum ki kyndon jong ka Election Commission.
