Shillong, Risaw 11
U Dr.Batskhem Myrboh uba dei u kyrtong ka Voice of the People Party (VPP) shiteng samoi sha Lok Sabha u la ong “Ngim thok, ngim shukor ïaphi, ki paidbah kin ai jingkyrshan ïa ka VPP”.
“U la khot la wer ïa baroh ki paidbah ba kin ai biang ka jingkyrshan ïa ka VPP, bad kumjuh ruh ïa kito ki bym pat ju kyrshan, ba kin kyrshan noh ha kane ka kynti ba mynta,” la ong u Dr.Batskhem haba kren ha ka jingïalang ka party ha ka sngi Saitjaiñ, ba la long ha madan Polo .
U la ong ba ka VPP, ka thrang shisha ban shakri ïa ki paidbah ka Jylla, ban wanrah ïa ka synshar kaba pynshong nongrim ha ka jingkhuit jingsuba, ban kamai ïa ka hok ne ha ka nongrim Blei, kumba la kren mynshuwa da (L) Dr.Ricky.
“Kumba ngi la pynjop ïa (L) Dr.Ricky, nga kyrmen ruh ba phin sa pynjop ïa nga ruh ha kane ka ilektion shiteng samoi,” u la ong.
Ha kum kane ka por, nga ai khublei ïa ki paidbah kiba la ai jingkyrshan ïa ka VPP, namar mynshuwa haba ong ïaleh ilection khlem pisa lane clean politics, ki briew ki ong kata bym lah ban long, hynrei ha jingmih ka VPP naduh u 2021, bad haba ngi la leh ilektion naduh u 2023, phi ki paidbah phi la ai jingkyrshan bapura ïa ka VPP.
“Nga ngeit bad nga khot ïa wer ïa phi sa shisien pat ba phin ai ka jingkyrshan ïa ka VPP,” la ong u Dr.Batskhem. da kaba ong “Kane ka lynti ïaid ba ka VPP ka ïaid, kadei tang kane ka lynti kaba lah ban tei shisha ïa ka Jylla jong ngi, ban tei ïa ka imlang sahlang bad ïa ka ri bad jaidbynriew”.
“Ngam tharai ban don mano-mano ban ong, ba ka jingkhuit kam long kaba bha, ngam tharai ki briew ba tip briew tip Blei kin ïengpyrshah ïa ka lynti ba ka VPP ka ïaid, bad ka jinghikai jong ka VPP ban ïaid ha ka lynti jong ka jingkhuid,” u la ong.
U la ong ruh ba ngi sngewthuh shai, ba lait na kane ka lynti ngim don da kiwei ki lynti, namarkata ngi ong, ba ngin wanrah ïa ka synshar khadar kumba u (L) Dr Ricky u ju kren, “Ka nongrim Blei”. Wan ïasnohkti lang, ba ngin wanrah ka jingkylla, ngin wanrah ka synshar khadar ba u paidbah un ïoh ban mad ïa ki jingkyrkhu lyngba ka jingsynshar.
“Wan ïasnohti lang bad ka VPP ban tei ïa ka jaidbynriew, kaba ngin wanrah ka synshar khadar kaba tip briew tip Blei, ka imlang sahlang kaba pynshong nongrim ha ki nongrim jong ka jaidbynriew, ka jaidbynriew ba tip briew tip Blei, ka kamai ïa ka hok,” la ong u Dr.Batskhem. Kata kadei ka nongrim jong ka Party VPP.
U la pynkynmaw biang ba dei ka jingmih ka VPP ba la ïoh u MP kum u (L) Dr.Ricky uba long kum u nuksa ïa ka ri bad ka jaidbynriew. Watla im don shuh ha sla pyrthei, hynrei ki jingnoh synniang sha ka politik ka long kaba khraw bad ka ban neh junom, ha kaba ngi hap ban bud nuksa. U long u khlur u ban ïalam lynti ïa ki longdien mandien.
