Jowai, Risaw 11
U Symbud Myntri Rangbah ka jylla Ma Sniawbhalang Dhar ha ka 9 tarik Risaw u la leit ban pynshngaiñ ïa ki samla pule jong ka Jowai Polytechnic ha ka sngi pynkut ïa ka Institute Week kaba long shibynta na ka jingrakhe ïa ka ‘Silver Jubilee Celebration’ (2001-2026).
Haba kren sha ki samla pule kiba long ka lawei jong ka jylla, u Ma Sniawbhalang Dhar, u la kyntu ban don ka jingsngewskhem bad jingshaniah halade, namar kan ïalam ïa ka jingthmu bad ka thong jong ki, ha kano ka lynti kaba kin ïaid shakhmat.
U la kren ruh ïa ki sienjam kiba ka Sorkar Jylla ka shim ban pynbit pynbiang ïa ki samla da kaba pynbiang ïa ki jaka pule ryngkat ki jingpule thymmai, namar ka Sorkar ka kwah ba ki samla ka jylla kin jied ïa kano kaba ki sngew donkam bad angnud ban jied.
Baroh ki samla ki don kajuh ka jingangnud bad ka jingphohsniew, ban long kum ki doctor, Engineer bad kumta ter ter, la ong u Ma Sniawbhalang Dhar, bad bynrap ba ka jingphohsniew kaba shisha ka long kata kaba pynlong ïa phi ban duh thiah haduh ba phin da ïoh ïa ka.
Ha ka jingïalang u Ma Sniawbhalang u la sam ruh sha ki samla pule halor ka jingim jong u kum u samla pule, u nongkhaïi bad nongmihkhmat.
Kiwei kiba la donlang ki long ka District Sport Officer Kong Linza F Syiem kum ka symbud kongsan, u Executive Engineer PWD Building, nalor ki nonghikai bad samla pule.
La pynphuh pynphieng ïa kane ka sngi da ki jingrwai bad ki jingshad tynrai na ki samla pule bad ka jingsam ïa ki khusnam sha ki nongjop ha ki jingïakop bapher bapher.
