Shillong, Risaw 11
Watla ka Ka Khasi Students’ Union (KSU) ka don hapdeng ki jingeh jingtynjuh ha ki jingïaid lynti ban shakri ïa ka jaitbynriew, ha ka 10 tarik u Risaw ka la hiar sha Them Barak Silchar Assam ban pynskhem ïa ki nongkit ka jong ka KSU Assam University Unit kaba don ha Silchar.
Ha kane ka sngi na ka Central Executive Council jong ka KSU la shimbynta da u Samla Shiningstar Kharbih-khiew, Environment Secretary ha ka jingdonlang u President ka KSU Barak Valley Circle, u Ma Walton Rymbai, u Chairman ka Barak Valley Khasi Jaintia Welfare Organisation u Ma Charles Rymbai, u Ma Morning Suja dkhot ka Khasi Development Council lem ki samla pule Khasi jong katei ka Skulbah.
Haba ai jingkren kum u kongsan u Samla Shiningstar u la ong ba ka thong jong ki samla pule katei ka skulbah ka dei ban ïoh ïa ka jingnang jingstad, hynrei u la pynpaw ïa ka jing-sngewnguh ïa ka jingkitkhlieh jong ki ban ïeit ban ïada ïa ka Ri bad ka jaidbynriew da kaba thaw ïa ka shnat teikam hapoh jong katei ka skulbah.
U la bynrap ba kum ki samla ba don ïa ka jingstad, ki dei ban pyndonkam hok ïa ka bad ban nang kyntiew ïa ka jaidbynriew baroh kawei da kaba u la ong “Pyndonkam ïa ka jingstad ban kyntiew ïa ka jaidbyriew”.
U Samla Andrew Gary Dkhar, Assitant Education Secretary KSU CEC haba ai jingkren ha katei ka sngi, u la pynkynmaw ïa ka jingphetwir ki khun Israel kiba la tip kum ki Jewish Diaspora, u la ong ba kine ki jaidbynriew ki la phetwir bad ki la shah peit beiñ ha baroh ki liang, katba kahm hadien kine ki jaidbynriew ki ïarap ban kyntiew iwei ïa iwei haduh ba ki la long kiba bit ba biang, kumta u la kyntu ïa ki samla pule da kaba u la ong “Watla ki jngai na Jylla lajong hynrei ki dei ban ïa kyntiew iwei ïa iwei khamtam ban tylli ha kino-kino ki jingeh”.
La ïoh ka jingsneng jingkyntu ïa ki nongkitkam ba thymmai bad ki nongïalam ka KSU Assam University Unit bad la pynphuh pynphieng ïa kane ka sngi da ki jingrwai jingshad na ki samla kahsi kiba pule ha katei ka skulbah.
Ha kane ka sngi ka KSU AU Unit ka ithuh bad ai khusnam ïa uwei u Samla kane skulbah uba long ruh u Advisor ka Unit u Samla A Bevan Kharbithai u ba dang leh ïa ka Research ha ka Department Physics ha kaba u la noh synniang haba ïa dei ka Astrophysics.
