Shillong, Risaw 11
Ka jingpynpoi umbam umdih ka Sorkar sha man ki thliew ïing lyngba ka skhim Jal Jeevan Mission (JJM) imat ka kylla long tang kum ka rymphong ban shu pyni pyrthei.
Ka shnong Jakrem naduh ba ïoh ïa ki kor um sha ki ïing ki sem haduh mynta kim pat ïoh satia kata ka umbam umdih.
Ki nongshong shnong ki la pynpaw ïa ka jingsngewdiaw ba naduh ba la ïoh ïa ki kor um ha ki ïing ki sem, ki ïoh um tang katno katne taiew hynrei hadien kata kim shym la ïoh um shuh.
“Ki kor um ki la tyrkhong bad ki la shu sarang bad sniew ei tang ba ka um te kim ïoh,” ki la ong.
Shuh shuh ki nongshong shnong ki la pynpaw ba haba ki pyrshang ban kylli kaei ka daw ba kam poi um, la ïathuh ba ki nongpeit ki pynpaw ba kata ka pump kam long. Kaba sngew lyngngoh shuh shuh ba da ki snem kata ka pump kam long bad imat kam don kata ka jingpynbha ne maramot ïa ka.
Ka jingbym poi ka um kumba la thmu ban pynbiang umbam umdih sha ki ïing ki sem ka la ktah shibun ïa ki paidbah namar bun ki ap ïa ka um na kine ki kor um.
Ki la buh jingkylli ruh balei ka tnad PHE kam leh eiei halor kane ka jingsniew jong ka Pump kumba la kam. Lada sniew ki la dei ban thied noh da kawei ne ban pynbha ïa ka.
“Ngi ïohi ha ki lad pathai khubor ba ka tnad ka la leit ai ïa kita ki khusnam sha kita ki shnong ba kane ka skhim JJM ka la lah ban pynpoi um, phewse ha shnong ba ka ophis ka don, ki paidbah kim ïoh um satia,” la ong ki nongshong shnong.
Ki paidbah nongshong shnong ki kyntu ïa ka tnad PHE ban peit lem ïa kane ka jingeh kaba ki paidbah ki mad bad ban shimkhia lem ban pynbiang um bad pynbha ïa kita ki pump lada ki la sniew kumba ki la kam.
