Shillong, Nailar:
Hadien ka jingmih ha ki lad pathai khubor ha kaba ïadei bad ka jinglap jong ka Hynñiewtrep Youths’ Council (HYC) ba ki don kiba pynlong jaka khalai bad jaka sah miet ha Ïewduh, na ka liang u Bah Saiñbor Nongkhlaw uba dei u Incharge ka thanat Hima Mylliem u la pynpaw ïa ka jingsngewsih kaba jur namar na ka liang jong ki, ki la trei shitom ban jurip hynrei kim lap ïa kine ki kam sniew wat la na ka por sha ka por ki la ju ong ïa ki nongshong dukan ba kim dei ban sah miet ha ïew pynban ki dang don pat kiba pynkheiñ ïa ka aiñ.
U Bah Nongkhlaw u la ong ba na ka liang jong ka ophis thanat Hima Mylliem kan sa shimkhia ban leh da kaba tyngeh nangne shakhmat bad ki la dep ban shim ïa ki kyrteng jong ki briew kiba sah beaiñ ha ïew bad na ka liang u Syiem un sa leh ïa kaba donkam.
“Na ka liang ka jong ngi, ngin sa shim da kaba tyngeh mynta bad ngi la dep ruh ban shim ïa ki kyrteng jong ki briew ba u Syiem un sa leh ïa kaba donkam”, la ong u Bah Nongkhlaw.
Ha kaba ïadei bad ki dukan kiba pynlong ïa ka jingïaleh khalai, u Bah Nongkhlaw u la ong ba imat kitei ki dukan ha ka por mynsngi ki la buh tiar hynrei ynda la miet pat, ki la pynlong kum ka jaka ïaleh khalai. Kane ka long kaei-kaei kaba pynglyngngoh shikatdei eh ïa ka thanat bad na ka liang ka thanat ruh kan sa shimkhia halor kane.
“Nga ruh nga lyngngoh ha kato ka sngi ba ka don ka jingïaleh khalai, na ka liang jong ngi, ngin sa shimkhia ïa kane”, la bynrap u Bah Nongkhlaw.
Ha kawei ka liang u la pynpaw ruh ïa ka jingsngewkmen haba don ki sengbhalang kiba wan ban jurip hapoh Ïewduh namar ka long kum ka jingïatreilang na ka bynta ka bha ka miat bad kaba khuid-suba hapoh Ïewduh ka ban lait na ki jingma bad ki jingsniew kiba ap hadien habud ïa ki nongshong ïew shong hat.
