Shillong, Nailar 14
U Myntri ka Sorkar Jylla uba peit ïa ka tnat jngohkai pyrthei u Bah Paul Lyngdoh u la ong ba lada ka jingïakhih ha Bangladesh ka long ka nongmuna na ka bynta jong ngi, ka long pynban kumba ai burom wat ïa kito kiba pynpra ïa u motdur jong u riewkhraw ka jaitbynriew, u Tirot Sing.
Haba kynthoh halor ka jingïakhih ha Bangladesh bad ka jingong ba donkam da ka jingïakhih kum ha Bangladesh ha kane ka Jylla, une u Myntri u la ong ba ka long laitluid ïano-ïano ban kren ïa kaba sngewbit ban kren.
“Ha nga shimet, bad ka Sorkar hi ka shim ba lada dei ban rah ïa ka Jylla kham shalor, dei ban peit nuksa na ki ri kiba la kham kiew kum ha dewbah Europe, kumno ki ai ki lad jingsumar ïa ki nongshong shnong, bad ka pule puthi,” u la ong. Halor ka jingdonkam ban don ka shongsuk shongshngaiñ, u la ong ba ka Thaiñ Shatei Lam Mihngi mynta bad 25 snem mynshwa ka la pher shibun khamtam lada phai sha ka liang ka jingdon ki kynhun lehnoh namar kiba bun ki Jylla ka Thaiñ Shatei Lam Mihngi ki la lait na kane ka jingeh bad mynta baroh ngi wad ïa ka lynti jong ka suk ka saiñ kata ka long, haba don ki jingeh ki don ruh ki lad ban weng ïa ki jingeh ha kaba ka Sorkar ruh ka ju plie ïa ka jingkhang ban ïakynduh bad ki kynhun bapher bapher ban ïakren. U la ong ba ngi ngeit ïa kane kawei ba kito kiba buh ïa ka jingbha jong ka Jylla ki shim ruh ba ka dei ka jingbhalang jong ki, bad kin mynjur ba ym don ka longïing ka longsem kaba janai nadong-shadong. “Haba ki don ki khnai ha ïing bad haba dei ban beh ïa ki khnai, kam mut ba hap ban thang ïa ka ïing baroh kawei,” u la bynrap.
