Shillong, Nailar:
Ka Juvenile Justice Committee, ka ïingbishar ka Jylla ha ryngkat ka jingïasnohktilang bad ka tnad Social Welfare, Directorate of School Education & Literacy, Commissioner for Person with Disabilities bad Community & Rural Development ha ka Sngi Ba-ar ka la pynlong ïa ka ‘State Level Consultation Programme’ ba shi sngi halor ka jingïada ïa ki khynnah ba don jingduna ha ki dkhot met ne ka ‘Protection of Children with Disabilities’ ha Auditorium jong ka ïingbishar ka Jylla.
Haba ai jingkren ha ka jingïalang, u Chief Justice ka ïingbishar ka Jylla, u Justice S. Vaidyanathan, u la ong ba ym duna ïa ka 1 ‘billion’ na ka jingbun briew ha ka pyrthei ki don ïa katto-katne ka jingduna la ka long naduh dang kha ne kaba wan jia hadien-habud bad kumba 240 ‘million’ ki dei ki khynnah.
U la ong ba ban ïada ïa ki hok longbriew-manbriew jong kito kiba don jingduna ha ki dkhot met, la sdang ïa ki prokram bad ki mat treikam ban pynleit jingmut ha ka ban kyrshan ïa ki khynnah bad ki ‘riew rangbah kiba don jingduna ha ki dkhot met.
Da kaba buh jingmut ïa ki jingeh jong ki khynnah ba don jingduna ha ki dkhot met ha kylleng ka pyrthei, ka long kaba donkam ban kyntiew ïa ki jingpyrshang ban ïatreilang kumjuh ban pyntreikam hok ïa ki kular, ban ïakhun ïa ka jingshah ñiew beiñ ha ka imlang-sahlang haba ïadei bad ka jingduna, kaba ïalam pat sha ka jingshah kyntait ha ka imlang-sahlang, u la bynrap.
U la ban jur ba ka jingthmu jong kane ka jingïalang ïamir jingmut ka long ban kyntiew ïa ka jingai jinghikai ban sngewthuh ïa ki mat ba ïadei bad ki jingduna dkhot met bad ban khring jingkyrshan na bynta ka burom, ki hok bad ka jingmanbha jong ki khynnah ba don jingduna ha ki dkhot met.
U khmih lynti ba kane ka jingïalang kan pynmih ïa shibun kiei-kiei kiba tei bad kiba lah ban khmih bniah ïa ki jingeh kiba ki briew kiba don jingduna ha ki dkhot met ki ïakynduh.
Na ka liang u Justice H. S. Thangkhiew, nongbishar ka ïingbishar ka Jylla bad Chairperson ka Juvenile Justice Committee haba ai jingkren u la ban jur halor ka jingdonkam ban don ïa ka rukom pyrkhat kaba kynthup lang ïa baroh. U la kdew ruh ïa ki bynta ba ïadei bad ka aiñ bad ki jingmyntoi jong ka ‘Rights of Persons with Disabilities Act’ bad ka ‘Juvenile Justice Act’.
Ha kane ka jingïalang la ïadonlang ruh u Sampath Kumar. Principal Secretary, Social Welfare, Swapnil Tembe, Director, Directorate of School Education & Literacy, Kong Bertha Dkhar, Executive Director, Bethany Society, Shillong lem bad ki ophisar na ki tnad treikam bapher-bapher.
