Shillong, Nailar 14
Ka Ïingbishar Meghalaya High Court ka la bthah ban thaw da ka Committee na ka bynta ban khmih lut ïa baroh ki bynta kiba ïadei bad ka krem Mawjymbuiñ ha Mawsynram, kata ka long, kumno la pynïaid ïa kane ka krem da kaba buh jingmut ruh ïa ka jinglong kyntang jong ka jaka, ka jingshimkhia ha kaba ïadei bad ka mariang bad ka bynta kaba ïadei bad ka niam.
Ïa kane ka rai la pynmih da ka Ïingbishar lyngba u nongbishar Justice HS Thangkhiew haba shim ban bishar ïa ka mukotduma da ka kynhun Yatra halor ka jingbym ïoh jingbit ban ïaid sha krem Mawjymbuiñ ha Mawsynram.
“Namar ba kane ka kam ka donkam ban kham shim khia bha shwa ban ai ïa ka rai kaba khatduh, ka Ïingbishar ka ka sngew donkam ba hap thaw ïa ka Committee ban khmih bniah ïa baroh ki bynta kiba ïadei bad katei ka kam kumno la pynïaid ïa ka krem …….,” la ong ka Ïingbishar ha ka rai kaba la pynmih.
U Bah H. Rapsang, Assistant Headman/Rangbah Shnong ka shnong Mawsynram bad uba dei ruh u nongaiktien, u la pyntip hakhmat ka Ïingbishar ba ki pdiang bad tip ïa ka jingshisha ba ka krem Mawjymbuiñ ka dei ka jaka kaba kongsan ban khring ïa ki nongjngohkai nalor ka jinglong kyntang kaba bun ki wan ban pynlong ka jingmane kiba dei na ki jingngeit bapher bapher.
Hynrei u la kyrpad ba khnang ban poi sha ka jingïabeit kaba mynjur lang (consensus) bad ban pynmih ki kyndon ban shah ïa ka jingleit jngoh kaba long jai jai ïa kane ka jaka, donkam ban don shuh shuh ka jingïasyllok.
Kumta na ka liang u nongsaid aiñ u S. Jindal, uba dei na ka bynta kiba mudui, u la pynpaw ba halor ka jingong u Assistant Headman/Rangbah Shnong, u la pynpaw ba la sngewthuh ba namar ka jingkhim ka por, ïa ka rai lehse ym pat lah ban shim noh mynta, hynrei la mynjur ba katkum ka jingbthah ba ïa mynta u snem, lehse ka jingpynlong ïa ka yatra yn nym pat leh ïa mynta katba dang ap shuh shuh ïa kiei ki ban mih na kane.
Kumta ka Ïingbishar ka sngewdei ban thaw da ka Committee ha kaba la bthah ïa ka Deputy Commissioner ka East Khasi Hills District ban ai ïa ki kyrteng jong kito kiba dei ban don ha ka Committee ban khmih bniah ïa kane ka kam.
Namar kata, ka Ïingbishar ka la buh sngi biang ban shim bishar ïa kane ka kam ha ka 22-08-2024 na ka bynta ban pynpoi ïa ka thup kyrteng bad ban ai hukum shuh shuh.
