Shillong, Nailar 14
Khnang ban lah kyntiew shuh-shuh ïa ki kam jngoh kai pyrthei hapoh ka Jylla, ka Sorkar Jylla lyngba ka tnad ki kam jngoh kai pyrthei ka la pynlong ïa ka jingïalang ïamir jingmut ban ïasyllok hapdeng ki kynhun kiba don bynta bad ki kam jngoh kai pyrthei bad ka tnad ki kam jngoh kai pyrthei ka Jylla ïa kaba la pynlong ha ka Sngi Balang ka 14 tarik u Nailar 2024 hapoh ka State Convention Centre, Shillong.
Ha kane ka sngi, u Myntri Rangbah ka Jylla, u Conrad K. Sangma u la pynbna ba ka Sorkar kan thung ïa ki nongshong shnong kum ki ‘Tourist Assistant’ ha ka rukom ba la buh kyrdan bad kine ki briew kiba phong jaiñ shiteng kin long kum ki nongpynïaid ïa ki nongjngohkai pyrthei, kin ai ka jingpahara, bad kin ai jingtip ïa ki nongjngohkai pyrthei.
“Ka thong ka long ban pynlong ïa ki nongwan jngohkai pyrthei ban sngewshngaiñ bad ban pynthikna ba kin ïoh ïa ki jingtip kiba thikna,” la ong u Myntri Rangbah.
U Myntri Rangbah u la ong ba kane ka jingthmu kan ai kam ruh ïa ki samla trai ri da kaba pynpaw ruh ïa ka jingdon ka jingpynkheiñ aiñ bad ka suk ka saiñ kiba dang shen kiba ktah ïa ka kam jngohkai pyrthei, da kaba pynksan ïa ka jingdonkam ban ïatreilang.
“Ngi dei ban ïatreilang ban pynrem ïa kum kine ki jingjia bad ban kyntiew ïa ka jinglong kaba bha na ka bynta ka kam jngohkai pyrthei,” u la ong.
“Ngi pynïasoh ïa ki nongïalam tynrai, ki sengbhalang, bad ki nongïashim bynta ha ki jingïakren jong ngi ban kyntiew ïa ka kam jngohkai pyrthei ha ka jylla. Ha kine ki hynriew snem ba la dep, ka Sorkar ka la wanrah ïa ki kam jngohkai pyrthei bapher bapher ban buh kyrdan bad ai kyrteng ïa ka Meghalaya”, u la bynrap. U la kyntu ïa ki nongshim bynta ban ai jingmut na ka bynta ban pynroi shuh shuh ïa ka rukom jngohkai pyrthei. U la ong ba ka jingthmu jong ngi kam dei tang ban pynbun ïa ki nongwan jngohkai pyrthei hynrei ban thaw ruh ïa ki jingleit jngohkai bad ki jingïaid lynti kiba kyrpang kiba pynbha ïa ka jingïakynduh jong ki nongwan jngoh kai pyrthei.
Shuh shuh u la ong ba ka Sorkar ka dang pynbha ïa ki jingtei bad ki jaka jngohkai pyrthei, kynthup ïa ki hotel, ki jaka sah, ki jaka bam, ki jaka ïaid kai, bad ki jingdonkam kum ki jaka ïaid kjat bad ki jaka buh jingthoh bad ka nongbah Shillong bad kiwei kiwei ki jaka jngohkai pyrthei ki ïoh ïa ka jingpynkylla dur da ki jingtei kiba thymmai ban pynitynnad ïa ka jingitynnad jong ki.
Na ka liang u Bah Paul Lyngdoh u la ong ba lada ka Sorkar Jylla ka wan shakhmat ban kyrshan bad kyntiew ïa ki kam jngoh kai pyrthei hapoh ka Jylla, ki ju don ki kynhun kiba ong ba ki dei tang ki kam tamasa ban pynlut pisa suda.
Da kaba pynkynmaw ïa ka tamasa Cherry Blossom kaba la pynlong mynshem snem hapoh Bhoirymbong, u la ong ba haba ka Sorkar Jylla ka la bei tyngka ïa kane ka tamasa kumba T.2 klur, ki la don ki briew kiba ong ba ki dei tang ki kam pynlut-phut katba ka Sorkar jong ka Jylla Nagaland pat ka la bei tyngka haduh T.10 klur na ka bynta ka jingpynlong ïa ka tamasa ‘Hornbill’ bad baroh kawei ka Jylla ki la ai jingkyrshan ïa kane ka sienjam. U la ong ba kine ki tamasa kim dei ki jingpynlut kai hynrei ka dei ka jingbei tyngka namar haba bei tyngka kan don ka jingïohnong.
Ki la don ar tylli ki bynta ha kane ka jingïalang ban ïakren bad ïamir jingmut halor ki kam jngoh kai pyrthei hapoh ka Jylla. Ha ka kylla step ka la don ka jingïalang ai jingmut jong ki Director ka tnad Tourism ha ryngkat ka jingïadonlang jong ki DC, SDO bad u kongsan u dei u Myntri ki kam jngoh kai pyrthei ka Jylla, u Bah Paul Lyngdoh nalor kiwei-kiwei ki nongïashim bynta bad ki nongai jingkren. Katba ha ka jingïalang pynkut kaba la long ha ka janmiet jong katei kajuh ka sngi, u kongsan u dei u Myntri Rangbah ka Jylla, u Conrad K. Sangma. La ïoh ruh ïa ka jingkren na u Bah Paul Lyngdoh, u Bah Cyril V.D. Diengdoh, IAS, Director ka tnad ki kam jngoh kai pyrthei ka Jylla. Shuh shuh ha kane ka sngi la ïoh ruh ïa ka jingkren na u Bah Maremdor Syiem, Syiem Khynnah ka Hima Sohra, u Bah Thomlin Khongthohrem, Rangbah Shnong ka Mawlynnong, u Bah S. Lato, u dkhot ka JTES nalor kiwei-kiwei.
