Jowai, Nailar:
Ka FKJGP Jaiñtia Hills Region ryngkat ka Synjuk ki Waheh Shnong War Jaiñtia ki la hiar sha ka thaiñ khappud na Dawki ha ka 13 tarik Nailar. Ha kane ka sngi ki la ïakynduh shwa ïa u OC ka thanat Dawki ban kyntu ïa u ban pynkhlaiñ ka jingpahara ha khappud da ka jingïatreilang bad ki bor pynïaid shnong.
Hadien kane ki la leit peit ïa ki jaka pahara jong ki shipai BSF naduh na Riahjalong haduh Amdoh ha kaba la lap ba duna bha ka jingdon ki shipai BSF kiba dei ban pahara ha khappud bad la lap ruh ba don ki ïing pahara jong ki shipai kiba thylli.
Shuh shuh la lap ruh ba don ki nong Bangladesh kiba shna ïing ha khappud harud u maw pud jong kine ki ar ri.
U President ka Synjuk Waheh Chnong u Twinson Rymbui bad u General Secretary Bah Kampher Pohlong, ki la pynpaw ka jingsngewkhia ban lap ba duna ki shipai BSF khamtam ha kum kine ki por ba don ka jingïakynad ha Bangladesh kaba la pynbor ïa ki katto-katne ki rit paid ban pyrshang phet sha ri India.
Ki la kyntu ruh ïa ka sorkar bad bor District ban shimkhia namar ki nong Bangladesh ki lah ban rung tuh ha kano kano ka por sha ki shnong khappud kaba lah ban ktah ruh ïa ka shong suk shong shngaiñ.
U Bah Damien War, President ka FKJGP West Jaiñtia Hills u la ong hadien ka jingwan jurip ïa ka thaiñ khappud, la lap bym don ka jingker sainar shiah ha khappud bad kane kan pynsuk ïa ki nong Bangladesh ban rung tuh shapoh ka ri khamtam mynta ba don ka jingkulmar ha katei ka ri.
