Shillong, Nailar 14
Ki dkhot jong ka KSU Ranikor Circle ha ka Sngi Balang ha ka por kumba 1 baje eiei ki la ïoh ban bat noh ïa 24 ngut ki briew bym dei Khasi ha Ranikor katba ki dang wan kiew na ka thaiñ khappud jong ka shnong Maheshkhola ha South West Khasi Hills District kaba dei ka shnong khappud bad ka Ri Bangladesh.
Ka KSU hadien ba la ïoh bat ïa kine ki briew bad da ka jingartatien ïoh ba ki dei ki khar Bangladesh kiba wan rung tuh kum ki nongbylla bad lap ruh ba kim don ïa ki kot ki sla kiba biang ka la aiti noh sha ki pulit jong ka thanat Ranikor ba kin leh ïa kaba donkam.
Na ka liang ka seng ka buh ruh ka jingkyntu ïa ki shipai ïada khappud (BSF), ïa ka tnat Pulit bad ruh ïa ki bor pynïaid District jong ka South West Khasi Hills District ba ki dei ban shimkhia halor kane ka mat ba wan kiew ki briew bym dei ki trai ri trai muluk khamtam na ki thaiñ khappud namar kum ka seng ka don ka jingsuba jur ba ki lah ban don ki khar Bangladesh kiba wan kiew hadien ba ka la don ka jingkulmar ha Ri Bangladesh ha kine ki por.
Ka KSU ka maham ruh ïa ki kontraktor bad ki nongai kam ba kim dei ban pyrkhat tang ïa ka ïohnong shimet jong ki da kaba khot ïa ki khar Bangladesh ban wan trei ne wan bylla hynrei ki dei ban husiar ïoh kan mih kaei-kaei ka jingeh hadien habud. Ka seng ka maham ba lada ki ïarap ïa ki bym dei trai ri trai muluk ban wan rung kum ki nongbylla na ka liang ka seng kan sa leh ïa kaba donkam.
Ka seng kan nang ïai peitngor ban pyni da ka kam ban ïada ïa ka thaiñ khappud bad lada ki bor district, ki bor pulit bad ki shipai ïada khappud kim shimkhia ne kim lah ban leh eiei halor kane ka mat na ka liang ka seng kan leh ïa kaba donkam bad kan shim hi ïa la ka bynta.
