Shillong, Nailar 14
Ka Sorkar Jylla ka la pyllait paidbah ïa ka almanak na ka bynta ban pynlong ïa ki tamasa bapher-bapher kum shibynta ban kyntiew ïa ka kam jngohkai ha kane ka Jylla ha kaba yn sdang da ka jingwan u nongpyntem sur jingrwai lane DJ uba na Norway, u Alan Walker sha kane ka nongbah, nalor ka tamasa Cherry Blossom ha kaba ka ri Japan ruh kan ïadonbynta lang.
Haba kren sha ki lad pathai khubor ha ka Sngi Balang hadien ba la pyllait paidbah ïa ka almanak halor ki tamasa ki ban sa pynlong ha kane ka jylla, u Myntri ka tnat jngohkai ka Jylla, u Bah Paul Lyngdoh u la ong ba ki don bun tylli ki tamasa kiba la pyndap lypa ban pynlong ha kane ka Jylla, bad u la ong ba ka tamasa Cherry Blossom mynta u snem ka dei ruh kaba la pynbeit ban donbynta ka Japan ban pyni ïa ka jingriewspah jong ka ha ka liang ka lariti ha kane ka tamasa.
Ka jingsdang ki tamasa ka kynthup ïa ka jingwan u Alan Walker ha ka 28 tarik Nailur, 2024 ha kaba yn pynlong ha Shillong Lariti Performing Centre, Mawkasiang, bud sa ka Meghalaya Kayak Fest ha Umtham Ri-Bhoi district naduh 10 tarik haduh 12 tarik Risaw, 2024, ka Shillong Literary Festival ha Nan Polok naduh 12 tarik haduh 14 tarik Naiwieng, 2024, ka Cherry Blossom Festival ha Madan Kurkalang, Ri Bhoi district naduh ka 15 tarik haduh 16 tarik Naiwieng, 2024 nalor ka Megong Festival ha Jengjal, West Garo Hills district naduh ka 29 tarik haduh 30 tarik Naiwieng, 2024.
Kiwei pat ki tamasa kiba la pynkhreh ki long ka Hills Festival ha Lum Er Pyngngad Umbir, Ri Bhoi district ha ka 6 tarik bad 7 tarik Nohprah 2024, bud sa ka jingwan u nongrwai Bryan Adams ha Shillong ha ka 10 tarik Nohprah bad ka Winter Tales ha Nan Polok naduh ka 12 tarik haduh 14 tarik Nohprah, 2024.
U Bah Paul u la ong ba kine ki tamasa ki dei kiba yn pynlong kum shibynta ban pynpaw shuh shuh ïa ka Jylla ha ka liang ka kam jngohkai pyrthei bad pyni sha ka pyrthei ïa ki jingitynnat kiba don ha ka ban khring shuh shuh ïa ki nongjngohkai ban wan sha kane ka Jylla.
Haba kylli shaphang ka jingbei pisa ka Sorkar ban pynlong ïa kine ki tamasa, u Bah Paul u la ong ba haduh mynta ym pat lah ban batai namar yn dang ai ïa ki jingkheiñ jingdiah kiba donkam.
Halor ka jingshah kynthoh ba ka jingbei pisa ka Sorkar ban pynlong ïa ki tamasa ban kyntiew kam jngohkai ka dei tang ka jingpynsyrwa kai ïa ka pisa, u Bah Paul u la ong ba kiba kynthoh kin kynthoh beit hynrei ka don ka jingmyntoi na kine ki tamasa namar ki briew ki wan sha kane ka Jylla bad ki tip kham bha shuh ïa ka jingdon ki jaka jngohkai bad khring ïa ki ban pynlut por khnang ban leit peitkai.
