Shillong, Nailar:
U Bah Granarysterfield Thangkhiew uba dei u para trai jong u Bah Cherishstarfield Thangkhiew, General Secretary barim ka Hynñiewtrep National Liberation Council (HNLC), uba la shah siat ïap ha ki ktang suloi jong ki pulit ka Jylla ha ka 13 tarik u Nailar 2021, u la ong ba lada u Bah Che u dang don bad ka seng HNLC, ki bor pulit bad ka Sorkar kin nym ïoh satia ban siat ïap da kaba suk namar ka jinglong jong u Bah Che ka long kaba shlur bad bym ju pyndem satia bad u dap da ka jingshynrang mynsiem bad ka jingtieng kam don jaka ha ka jingim jong u.
Haba ai jingkren ha ka jingïalang kaba lyngkot kaba la pynlong ha ka 13 tarik u Nailar 2024 kaba dei ruh ka sngi lyngkhuh khlad ba 3 snem jong u Bah Cherishstarfield Thangkhiew ha u lum jingtep ha Lawmali, u Bah Granary u la ong ba kane ka jingwan ïasnohkti lang jong ki sengbhalang bad ki ‘riew paidbah ban kynmaw burom ïa ka sngi khlad u hynmen jong u ka pynpaw ba kum ka Jaitbynriew ka khlem iehnoh marwei ïa ka ïing ka sem u Bah Che wat haduh kine ki sngi hynrei ki ïai don ryngkat beit ha syndah.
“Kane ka sngi ka pynkynmaw ïa ngi kum ka ïing ka sem ha ki 3 snem mynshwa haba ki bor jong ka Sorkar, kaba ngi lah ban ong ki lehnoh jong ka Sorkar hapoh ka jingïalam jong u Jagpal Singh Dhanoa bad katto-katne ngut ki pulit Khasi kiba don ha syndah jong u, ki la wan shim bad knieh jyndat ïa ka jingim jong i na ka sla jong kane ka pyrthei”, la ong u Bah Granary.
Da ka sur ka jingpynrem jur ïa ki pulit bad ka Sorkar kiba la donkti ban dkhat jubor ïa ka jingim u hynmen, u Bah Granary u la ong ba haduh mynta kine ki sngi, ka ïing ka sem baroh kawei kam pdiang satia ïa ka jingleh khaweit bad leh ‘riewkhlaw jong ki bor Sorkar ban shim bad bthat jubor ïa ka jingim jong u hynmen jong u, u bym don shuh ïa ka bor ne wat hapoh ka seng ruh bad kiba la shim kabu ban pynhiar kput ïa u hynmen jong u ïa kaei kaba la jia ha ki snem kiba mynshwa namarba mynshwa kim ïoh ïa u kumta ki la wan noh ha ka por ba u la don ha ïing marwei.
“Lada u hynmen jong nga u ïap ha ka madan thma hapdeng ka jingïakhun, nga kum u para ruh ngam sngeweiei namar nga tip ha madan thma katba kloi ban siat nyngkong, te hynrei ba phin shu wan kumto haba u briew um don shuh ha ka seng bad shongthait da kaba phi shim kabu ïa ka jinglong jong i ba im don shuh ka lad jingïada, ha kata ka por phi shim kabu pynban ïa i. Nga shim ba kane ka dei ka jingkwah pynhiar kput jong phi ïa u hynmen jong nga ïa kaei kaba la jia ha ki snem ba mynshwa, mynshwa phim ïoh hynrei phi wan mynta ynda i la don satang marwei”, la ong u Bah Granary.
Shuh shuh u Bah Granaryfield u la kyrtiang dien da kaba pynkynmaw ïa ki sngi mynba u hynmen u dang don hapoh ka seng HNLC ha kaba ha ka por ba u wan ban jngoh ïa ki kmie ki kpa ha ka ïingsah kaba don ha Mawlai, um don satia kano-kano ka jinglong khynñiuh hynrei u la wan beit kum u ‘riew paidbah bad kiba pahara ïa u ruh ki ju ïathuh ba ka long kaba eh bha namar naduh na ka jaka sah kaba ki mih tad haduh ba kin da wan poi ha Mawlai, u ju ong ïa ki ban long kiba la pynkhreh ban khyrwit beit lada don eiei ha surok ym ban phet.
