Shillong, Nailar 14
Ki nongïalam bad dkhot ka Hynñiewtrep National Youth Front (HYNF) kiba la shah kem ha ka 26 tarik u Naitung 2024, ki la ïoh jamin noh ha ka miet jong ka 14 tarik u Nailar 2024 hadien ka jingshah kem halor ka jingpynsangeh ïa ki kali kamai ‘Tourist’ kiba wan nabar ka Jylla ha ka jingkieng Umtyngar ban ym shah satia ba kin leit sha ki jaka jngoh kai kiba don sharum ka thaiñ Sohra bad Dawki.
Kum ban kdew hangne, na ka liang ka seng hapoh ka jingïalam u President ka HNYF East Khasi Hills District, u Bah Steve Raymond Khyriem ha ka step jong ka 26 tarik u Naitung 2024, ka la leit ban hiar kyndit-kynsan sha ka jingkieng ha Umtyngar ban bat hi dalade ïa ki kali kamai ‘Tourist’ kiba wan nabar ka Jylla hadien ka jingleh mynthi jong ka sorkar jylla ban pyntreikam noh mardor ïa ka Meghalaya Residents Safety and Security Act (MRSSA) hapoh ka jylla bad ha kajuh ka por ban wanrah ïa ki rukom treikam jong ki kam jngoh kai pyrthei khnang ba ki kali kamai ‘Tourist’ kiba wan nabar ka Jylla kin nym ïoh satia ka lad ban kamai sahuh hapoh kane ka Jylla kaba la ktah ïa ka kamai-kajih jong ki nongñiah kali kamai ‘Tourist’ kiba dei ki paradoh-parasnam. Na ka liang ka tnad pulit ka la wan ban hiar sha katei ka jaka ha Umtyngar bad kem noh ïa ki dkhot bad nongïalam ka seng ha katei ka sngi namar ka jingpynthut jong ki ïa ki nongwan jngohkai pyrthei.
Ki nongïalam bad dkhot ka seng kiba la shah kem bad set ha thanat Sadar ki kynthup ïa u Steve Raymond Khyriem, President EKH, Bah Orester Mawlong, Disciplinary Secretary, Bah Andrew Lyngdoh, Secretary, Bah Banrap Wanniang, Vice President, Bah Frankie Lyngdoh, Office Secretary, Bah Melvin uba dei u dkhot, Bah Tyllibor Swer, Education bad kiwei-kiwei.
