Shillong, Nailar 14
Ha kawei ka jingjia ther kuli ha ka Sngi Balang ha Umdohlun, South West Khasi Hills District, uwei u rangbah u la sei ïa ka suloi bad synreit kuli naphang ha kaba la don kiba mynsaw hadien ba la mih ka jingkulmar ha Ïew Umdohlun. Tangba ym pat lah ban pyntikna ki don katno ngut ki briew kiba la mynsaw.
Katkum ka khubor, la ïathuh ba ki don katto-katne ngut ki briew kiba la mynsaw ha kaba la kynnoh ba uwei u rangbah u la pynmynsaw ïa ki ‘riew paidbah da kaba synreit kuli naphang hadien ba la mih ka jingkulmar ha Ïew Umdohlun.
Ïa ki katto-katne ki briew kiba la mynsaw na ka jingshah siat suloi, la pynkit noh mar-mar sha ka jaka ai jingsumar, bad haduh ba thoh ïa ka khubor, ym pat lah ban ong haduh katno ngut kiba la mynsaw bad aïu na ka liang ki pulit ki la leh, namar wat haba la pyrshang ban phone ïa ki heh pulit jong ka distrik ruh kim shym la shim ‘phone’ satia.
Ka tyllong khubor ba la ïohlum ka ong ba kane ka jingjia, ka la jia mynta ka janmiet hadien ba ki paidbah ki la leit sha ïing jong une u rangbah na ka bynta ban ïakren sngewthuh bad u halor ka bai musur kaba la lum ha ïew Umdohlun.
La ong ba ha ka por ba ki paidbah ki dang leit sha ïing jong u, une u rangbah u la siat pynban ïa ki ha kaba la don kiba la mynsaw bad don ruh kiba la phet kat shaba lap tang ban lait na ka jingshah synreit kuli.
Shuh shuh katkum ka khubor la ong ba kane baroh ka la mih hadien ba ka la don ka jingïapyni nia kaba jur ha Ïew Umdohlun ha ka por mynsngi.
Ha kawei pat ka liang, ka la don ka jingujor ejahar ha thanat Mawkyrwat mynta ka sngi hi da u Acting Lyngdoh ka Kur Paliar Mawkyrda Laikpoh Laikynthei, ha kaba la ong ba ka la don ka jinglum bai musur ha Ïew Umdohlun, ha kaba la kynnoh ba u Josingwell Paliar, uba dei u Moholdar ka Ïew Umdohlun, uba ju lum hi dalade ïa ka bai musur, um shym la wan hi mynta ka sngi, hynrei la phah da ki briew kiba ym ithuh ne tip kyrteng ban lum ïa ka bai musur.
La ïathuh ruh ba kane ka jingwan lum bai musur da kine ki briew ka la wanrah pynban ka jingïahylla bad ka jingpynmih nia kaba jur hapdeng ki nonglum bad ki nongshong ïew, kiba la kyntait ban siew, ha kaba kane ka thma ktien ruh hapdeng ki arliang mamla ka la neh slem bha.
Utei u Acting Lyngdoh u la thoh ha ka ejahar ba ka jingleh jong u Josingwell Paliar ka long kaba be-aiñ bad u la kyntu ïa ki pulit ba kin pynshitom bad tohkit ïa une u Moholdar katkum ki kyndon aiñ.
Hynrei namar ka jingbym ïoh ban ïakren bad ki bor pulit, ym pat lah ban pynthikna la katei ka jingshah ujor ejahar jong u Josingwell Paliar ka don jingïadei ne em bad katei ka jingjia shah siat pathar jong ki ‘riew paidbah.
