Shillong, Nailar:
U Lat ka Jylla, u C.H. Vijayashankar bad Myntri ka tnad C&RD, u A.T. Mondal ha ka Sngi Ba-ar ki la plie ïa ka “Har Ghar Tiranga” ha Raj Bhavan, Shillong.
Haba ai jingkren ha ka jingïalang, u Lat u la pynpaw ka jingsngewkmen ban ïashim bynta ban plie ïa kane ka jingïalap, da kaba ban jur ïa ka thong jong ka jingïalap ban pyni ïa ka lama ka ri ha man la ki longïing kumba la ïohi paw da u Myntri Rangbahduh ka ri, u Narendra Modi.
U la pynsngew halor ka jinglong kongsan jong ka jingïalap, kaba kyntiew ïa ka mynsiem ieid ri bad ka jingïatylli. Ïa kane la sdang ha ka jingrakhe dap 75 snem ka jinglaitluid ka ri, ban don ka jingsarong ïa la ka ri kumjuh ban pynshlur ïa ka mynsiem ieid ri.
Na ka liang u Lat u la pynpaw ruh ka jingsngewnguh ïa ka jingsynñiang ka Jylla sha ka jinglaitluid ka ri, da kaba kdew ïa ki nongïakhun laitluid ka Jylla kum U Tirot Sing, Kiang Nangbah, bad Pa Togan Sangma.
Ka jingïalang ka kynthup ruh ïa ka jingsam ïa ki lama ka ri bad ka jingpyllait ïa 2 tylli ki kot ba la pynmih da ka tnad Lariti, “U Tirot Sing” bad “Bravehearts & Champions of Freedom from the Hills.”
Ha kane ka sngi la don lang ki ophisar Sorkar, pulit, dkhot NCC, bad ki dkhot jong ki Self-Help Group.
