Nongpoh, Nailar 14
Ki pulit ka Ri Bhoi District ha ka Sngi Balang ki la ïoh ban kem ïa uwei u samla ryngkat u drok bad kiwei ki tiar pyndonkam dih drok.
Kane ka jingïoh kem ïa utei u samla ka dei hadien ba ki pulit ki la jing-ïoh jingtip kaba thikna ïa ka jingshalan drok, ha kaba ki la pynlong ïa ka jingpynap shrip ha Downgate Nongpoh bad ïoh ban bat ïa kawei ka kali Alto rong lieh kaba don ïa u nombor ML10-C-0012 kaba la ñiah da u Vicky Lyngdoh (23 snem) na ka shnong 20 Mer Pahammawleiñ.
Ha ka jingtalasi ïa katei ka kali, ki pulit ki la ïoh ban kurup noh ïa u drok Heroin uba khia kumba 2.47 gram, ar tylli ki mobile phone, 5 tylli ki thyrnia injek ki bym pat pyndonkam, ka song kaba la thoh Ex-A1 bad B1 lem bad ka Envelope kaba la thoh Ex-A & B ha kaba la thep ïa ar tylli ki synduk rit ban thep duma.
Halor kane ka jingjia, na ka liang ki pulit ki la kem noh ïa u Vicky Lyngdoh bad la pynrung mukotduma ruh ha thanat Nongpoh bad ka jingtohkit ban lapdien shuh ïa kiwei kiba donkti ka dang ïaid shakhmat katkum ki kyndon aiñ jong ka Narcotic Drug & Psychotropic Substances (NDPS).
