Shillong, Nailar 14
Wat hadien lai tylli ki jingïalang bad ka Sorkar Jylla, ki nongtrei SSA hapoh ka shatri jong ka All Meghalaya SSA Non-Teaching Staffs Association (AMSSANTSA) ki dang ïai bteng ïa ka jingïakhih shong kyllaiñ mungor jong ki bad kane ka la kynjoh sha ka 15 sngi ha ka Sngi Balang.
“Ka Sorkar ka la khot ïakren la lai sien, bad kin khot biang la 16 tarik,” la ong ka President ka AMSSANTSA, Kong Jennifer June Synrem.
Ka la ïathuh ba ha ka sien banyngkong bad ba-ar, ka seng kam da don than ka jingkyrmen naba ka Sorkar ka la pyni beit da ki jingkheiñ jingdiah jong lajong bad ka kwah ruh ba ki nongtrei SSA kin shim da kine ki jingkheiñ kiba ka la pynbiang.
“Hynrei ha ka sien kaba lai, ka la ai jingkyrmen khyndiat namar ha kane ka sien, ngi la ïoh ban ai ki jingkheiñ jingdiah kiba ngi la leh hi ma ngi,” ka la ong,
Haba ïadei bad ka Rationalization Committee, ka Kong Synrem ka la ong ba kane ka dei ha ka sien banyngkong ha kaba ka Sorkar ka la thaw ïa kane ka komiti bad ka buh lang ïa ki dkhot nongïakhih ban pynbeit ïa kata ka ‘Scale of Pay’ naduh ki kyrdan ba rit haduh kiba heh.
Haba buh ka jingkyrpad sha ka Sorkar, ka la ong, “Ka sien kaba saw, ngi pyrkhat ba kan don noh ka jingkyrmen ïa ngi. Phi ïohi ki don kiba wan ïalam ïa la ki khun ki kti na ki jaka ba jngai, ka Sorkar ka dei ban pyrkhat, sngewsynei lem noh ïa ngi keiñ khnang ban pynbeit noh ïa kane ka kam ha ka sien kaba saw kaba ki khot bad ai noh ka jingdawa jong ngi.”
Kum ban shu kdew hangne, ka Myntri ka Sorkar Jylla, ka Dr. Ampareen ha kine ki khyndiat sngi ba la dep, ka la leit jngoh ïa ki nongtrei SSA kiba la pynlong ïa ka jingïakhih ha Madan Malki.
Ki nongtrei SSA hapoh ka shatri jong ka AMSSANTSA ha ka 31 tarik Naitung ki la sdang ïa ka jingïakhih shong kyllaiñ mungor kaba khlem buh por namar ka jingbym shimkhia jong ka Sorkar halor ka jingdawa ban kyntiew ïa ka jingpynkiew tulop 80% kaba la sahteng mynta la kumba 8 snem eiei.
