Khliehriat, Nailar:
Ka Lad Rymbai Handloom Weavers Co-operative Society ha ka 13 tarik Nailar ka la sdang ban pynlong ïa ka jinghikai ba nyngkong eh halor ka jingthaiñ jaiñ na ka bynta 50 ngut ki nongshah hikai jong ka District.
La seng ïa kane ka Society ha ka 23 tarik Nailur 2008. Ka don baroh 15 ngut ki dkhot ha kaba u Martin Khiangte u long u Chairman bad u Reginald Khiangte kum u Secretary bad ka don ha Lad Rymbai, Tyrsoo kaba hap hapoh ka Wapung Community & Rural Development Block.
Ïa kane ka jingai jinghikai la kyrshan da ka Meghalaya State Skill Development Society, jong ka tnat Labour Employment & Skill Development.
Katkum ka jingong u Secretary ka Lad Rymbai Handloom Weavers Cooperative Society u Reginald Khiangte, kane ka prokram ai jinghikai kam donkam ban siew pisa bad ka Meghalaya State Skill Development Society kan sa pynbiang ïa ki tiar ki tar ha ka por ba pynlong ïa kane ka prokram ai jinghikai.
U Khiangte u la pyntip ba ïa ka bynta kaba ar jong kane ka jinghikai yn pynlong hadien saw bnai bad u kyrmen ruh ba lyngba kane ka prokram ai jinghikai ki paidbah kin lah ban kyntiew ïa ka ïoh ka kot ka jong ki.
Haba plie ïa kane ka prokram ai jinghikai, u Deputy Commissioner jong ka East Jaiñtia Hills u Shivansh Awasthi, IAS u la ong ba ki paidbah kim dei ban shaniah tang ha ka kam tih dewïong na ka bynta ka ïoh ka kot namar ki don shibun kiwei pat ki kam lad kamai kajih ban pynïoh nong ïa ki.
U ophisar jong ka Meghalaya Skill Development u Bah Lambormi Suchen u la ong ba ka Meghalaya State Skill Development Society ka long kaba la pynkhreh beit na ka bynta ban bei tyngka ïa kino-kino ki kam ban kyntiew ïa ka ïoh ka kot.
Ha kane ka sngi la donlang u Bah Alan Tariang, District Handloom Jowai, u Lalngaii Nampui Saipung Handloom Centre, u Ashokanand bad u Gregory James Lamare baroh arngut na Prime Hub bad Pynsuklang Hayong.
