Mairang, Nailar:
U District Magistrate jong ka Eastern West Khasi Hill District, u Bah G Kharmawphlang, IAS, u la pyntreikam da ka kyndon 163 BNSS 2023 kaba khang bad mana pyrshah ban bret pathar ïa ki plastik bad kiwei kiwei ki kynja song jingbam plastik ne bilor plastik ha ki shlem treikam, kolej, skul bad jaka jngohkai pyrthei.
Ha ka kyrwoh khubor, u District Magistrate u la pynpaw ba kane ka jingbret pathar ïa ki kynja plastik ka wanrah ka jingisih bad jaboh ïa ka mariang bad ki sawdong-sawkun jong ka hapoh ka Eastern West Khasi Hills District.
Shuh shuh u la ong ruh ba kino-kino kiba ïaleh pyrshah yn pynsaja katkum ki kyndon jong ka aiñ. U la ong ruh ba kane ka hukum kan treikam noh mardor tad haduh ynda pynbna da kumwei pat.
