Shillong, Nailar 16
U Myntri Rangbah ka Jylla, u Conrad K Sangma u la ong ba ka Sorkar Jylla ka don ïa ka jingangnud ban pynpoi ïa ka ïoh ka kot sha ka 100 billion ha u snem 2047 ynda dei ban rakhe ïa ka jingdap 75 snem ka Jylla.
Haba ai jingkren ha Madan Polo ha Shillong ha ka jingrakhe sngi laitluid jong ka ri kaba 78, u Myntri Rangbah u la ong ba haba pynkhreh ïa ka ‘Meghalaya 2032 vision’, u ïoh mynsiem na u Myntri Rangbahduh ka ri ha kaba ïadei bad ka Viksit Bharat kaba dei ka jingpynkhreh ban pynkylla ïa ka India sha ka ri kaba la kiew ynda la dei ban rakhe ïa ka jingdap 100 snem ka jingïoh laitluid ka ri India ha u snem 2047.
“Nga angnud ba ka Viksit Meghalaya ka dei ban kynjoh sha ka ïoh ka kot kaba 100-billion-dollar ha u snem 2047 ynda ngi rakhe ïa ka jingdap 75 snem ka jingïoh ïa ka Jylla Meghalaya,” la pynpaw u Conrad.
Kumta u la kyntu ïa baroh ban synñiang lang sha ka ïoh ka kot ka Jylla ban urlong ka jingphohsniew ha kine ki 10 snem (2022 haduh 2032).
U la ong ba ka ‘Meghalaya 2032 Vision’ kam dei tang ka jingbuhthong ka Sorkar ha kine ki 10 snem, hynrei ka dei ka jingpeit jngai na ka bynta ban ïoh lang ïa ka lawei, bad kane ka kot jingpeit jngai (vision document), ka la don hakhmat ki paidbah ban pule bad phah ki jingai jingmut bad jingangnud jong ki na ka bynta ka Meghalaya ha u snem 20232.
Kum ban pynkynmaw, ha u snem 2022, haba ka Jylla ka rakhe ïa ka jingdap 50 snem ka Jylla Meghalaya, u Myntri Rangbah u la pynkynmaw ïa ki sienjam kiba ka Sorkar Jylla ka la shim kynthup ka jingwanrah ïa ka Meghalaya Industrial and Investment Policy kaba buhthong ban khring ka jingbei pisa kumba T.10,000 klur la kumno kumno ha u snem 2028 bad ka ban ïarap pynmih 5 lak tylli ki kam ha kaba ka GDP jong ka Jylla kan kot sha 16 billion dollar ha u snem 2032.
Ha kane ka sngi u Myntri Rangbah u la kren shibun kiei kiei kiba ka Sorkar ka la leh bad kiba ka dang thmu ban pyndep na ka bynta ban kyntiew ïa ka Jylla ha baroh ki liang kynthup ki kam pynroi bad ki lad ban seng kam lajong bad aikam ïa ki samla ka Jylla.
La rakhe ïa ka sngi laitluid ha kylleng ha ka Jylla ha kaba ki Myntri Sorkar ka Jylla, ki MLA bad ki ophisar ki la donbynta lang lem bad ki nongshong shnong kiba la wan ban ïashimbynta shitrhem ha kane ka sngi.
