Shillong, Jylliew 14
U Bah Ardent Millar Basaiawmoit, President ka Voice of the People Party (VPP) u la ther tyngeh ïa ka National People Party (NPP) halor ka jingrai jong ka, ban pynïakhun ïa Dr. DRL Nonglait sha ka ilekshon shiteng samoi Lok Sabha na Shillong Parliamen-tary Konstitwensi.
Ia kane u Bah Ardent u la kren ha ka jingïalang pynithuh kyrtong ka VPP kaba la long ha iew Patharkhmah, ha ka sngi Saitjaiñ jong ka taïew.
U Bah Ardent Miller Basaïawmoit, u la pyn ïa nujor halor ka rukom sei kyrtong ka VPP bad ka NPP.
Haba kren halor kane ka phang, u Bah Ardent u la ong ba ka jingsei ka VPP ïa u Dr. Batskhem Myrboh, kum u kyrtong u ban ïa aireng ha ka ilekshon MP shiteng samoi sha Lok Sabha, kadei namar ba ka don shisha ïa ka jingangnud.
U Bah Ardent u la ong, ba ka jingsei ka VPP ïa u Dr.Batskhem Myrboh, kadei namar ka jingngeit bad jingangnud ban shakri hok ïa ki paidbah.
U la buh jingkylli ïa ka jingbym ai suk ka NPP ïa u Dr. DRL Nonglait ïa ka shuki Rajya Sabha, hynrei ban pyn ïakhun ïa u ha ka ilekshon kaba jwat da kaba kynnoh ba kadei tang ka jingpynthame bad ka jingbym kwah jong ka ban aibor ïa u Dr. Nonglait.
U Bah Ardent u la ong ruh ba lada ka NPP ka don shisha ka jingngeit ha ka jinglah jong u Dr.DRL Nonglait, balei kam ai suk ïa u ha ka shuki MP Rajya Ssabha hynrei ka pynïakhun pynban da ka shuki MP Lok Sabha, kaba don ka jingeh bad ïaknieh.
U Bah Ardent u la kynnoh ba kane ka jingleh ka NPP la pynpaw ïa ka jingbym kwah jong ka ban ai bor ne ban pynkupbor ïa u Dr.Nonglait hynrei ka shu pyndonkam ïa u kum u kyrtong ban don bynta ha ka saiñ pyrthei.
Namarkata, u la ong ba ki paidbah kidei ban bishar bha ïa kane ka rukom treikam bad ban shim ïa ka rai kaba dei ha kane ka ilekshon shiteng samoi.
