Shillong, Jylliew 14
Halor ka jingmih ka jingkynnoh na u Bah Pynshailang Lyngdoh, President ka Seng Samla Hima Langrin, ba ka Hima Langrin ka la shim khajna beaiñ khlem da ïoh jingbit na ka Khasi Hills Autonomous District Council (KHADC), na ka liang u Bah Bryllyen Henry Syiemiong, Acting Syiem ka Hima Langrin, u la mih shakhmat ban ai ka jingpynshai halor kane ka mat.
Haba kren sha ki lad pathai khubor ha ka 13 tarik u Jylliew, 2026, u Bah Bryllyen Henry u la ong, ba ka jingkynnoh u Bah PS Lyngdoh, kadei ka bym shong nongrim namar ba u dei u briew uba kwah ban wanrah ka jingkulmar ha ka Hima.
U la ong ba ka Hima ka khlem ïaid lait na ka KHADC bad ka jingaiwai ïa ki mar ki mata ka Hima, kadei kaba la ïoh jingbit na ka Council.
U Syiem ba shu thung u la kynnoh ruh, ba u Bah PS Lyngdoh, u ju pan pisa na ka Hima kaba la kot lak ha ka kyrteng ban kyntiew ïa ki Samla, hynrei um ju pyndonkam hok ïa ka.
“Nga kum u Syiem ba shu thung, nga la sngewkhia haba ïadei bad ka jingkynnoh jong u Bah PS Lyngdoh, ba ka Hima ka la lum khajna beaiñ. Kaba u la kynnoh ba ka Hima ka la ïalam bakla ïa ki nongkhaïi, ki nongtrei kiba sha ki thaiñ Borsohra bad Cherragaon,” u la ong.
U la ïathuh ba ka Hima Langrin ka la pan ka jingmynjur na ka District Council ha u bnai Kyllalyngkot, ban ai wai ïa ki mar ki mata jong ka Hima na bynta ka snem 2026-2027.
“Ka jingkynnoh u Bah PS Lyngdoh ba ka Hima ka la ai wai beaiñ ïa ki mar ki mata, kadei kaba la ïalam bakla ïa ki paidbah, namar ba ka Council ka la dep ai ka jingmynjur ba myn ha ka 12 tarik u Jymmang 2026,” la ong u Bah Bryllyen Henry.
Shuh shuh u la pyntip, ba ka Hima kam shym la leh tang da ka bor jong ka Hima, hynrei kadei kaba la ai jingmynjur da ka District Council.
