Shillong, Jylliew 14
U Myntri ka tnad Road Transport & Highways ka Sorkar Pdeng, u Nitin Gadkari ha ka Lah Sngi U Blei un sa plie ïa ki 6 tylli ki projek surok ba kongsan kiba kot T.3,214 klur ha ka Jylla ha ka jingïalang North East India Infrastructure Summit & Exhibition (NEIINFRA), 2026.
Kane ka long ruh kawei na ki projek pynroi surok kaba heh tam jong ka Jylla ha kine snem ba la dep.
Ki projek ki kynthup ïa 4 tylli ki jingpyntrei National Highway bathymmai bad ka jingpynbha ïa 2 tylli ki ‘Highway Corridor’ kiba la don lypa, kiba thmu ban pynbha ïa ka jingpynïasoh, ban pynduna ïa ka por leit jingleit bad ban pynkhlaiñ ïa ka jingïadei ha ka ïoh ka kot ha kylleng ka Meghalaya.
U Myntri Rangbah ka Jylla, u Conrad K. Sangma u la pynbna ba yn buh ruh ïa ki mawnongrim na ka bynta ki projek ha kane ka jingïalangbah, da kaba batai ïa ka jingbei tyngka kum ka sienjam kaba kongsan ban pynsted ïa ka roi ka par ha ka Jylla.
Kane ka song ka kynthup ïa ka surok Tura Bypass kaba shongdor T.951 klur, ka surokbah Dhubri-jingkieng Phulbari-Selsella kaba shongdor T.737 klur, ka Pynursla Bypass kaba T.564 klur bad ka projek surok Selsella-Goeragre kaba T.504 klur.
Ha kajuh ka por, yn sa plie ruh ïa ki kam pynbha na bynta ka surok Shillong-Dawki, bad ka surok Jowai Bypass.
