Shillong, Jylliew 14
Ka Jaiñtia Coal Owner’s Miners Supplier & Workers Association (JCOMSWA) ka la rai ban leit tur biang sha ka ophis jong u Deputy Commissioner ka East Jaiñtia Hills ha ka 16 tarik mynta u bnai Jylliew naduh ka por 10 baje mynstep.
Kane ka rai ka dei kaba la shim kyrkieh ha ka janmiet jong ka 14 tarik Jylliew hadien ka jingtlot u Bah Marshal Biam, President ka JCO-MSWA uba la shah thngan mynta la khadsaw sngi ban dawa na ka Sorkar ba kan plie biang ïa ka jingtih dewïong na ka bynta ban kamai jakpoh ki paidbah.
Katkum ka kyrwoh ba la phah da u Bah Overcome Dkhar uba dei u Information Secretary u la ïathuh ba ka jingleit tur biang sha ophis DC ka East Jaiñtia ka long ban dawa pynurlong ïa ki 8 tylli ki mat jingdawa.
Kumta u la kyntu ïa ki sengbhalang, ki nongñiah kali kamai, nongñiah trok, ki nongshong ïew, ki riew paidbah kynthei bad shynrang kin ïakynduh ha Ladrymbai Dongwah ha ka por shiphew baje mynstep kaba dei ka jaka shah thngan u Bah Marshal bad nangne kin sa leit tur sha ophis DC.
Shuh shuh u la ïathuh ba ka jingleit tur biang sha ophis DC ka dei namar ka Sorkar kam shym la sngap ïa ka jingdawa jong ka seng ha kine ki sngi haba u Bah Marshal u la shah thngan naduh ka 1 tarik Jylliew 2026.
U la ïathuh ba u Bah Marshal mynta u la sdang tlot namar ka BP ka la poi kumba 50 percent bad ki doktor ki la hap ban ai drip.
