Shillong, Jylliew 14
Ka kad liengsuiñ jong ka Shillong kan rakhe ïa ka Yatri Suvidha Diwas ha ka 15 tarik u Jylliew 2026 ban pynskhem biang ïa ka jingkular jong ka ban ai ka jingshakri kaba shngaiñ, kaba skhem bad kaba paka na ka bynta ki nongleit nongwan.
Kane ka jingrakhe kan pynpaw ïa ka jingïaitrei jong ka ban kyntiew ïa ka jingbit jingbiang jong ki nongleit nongwan bad ban pynkhlaiñ ïa ka jingïadei bad ki. Ha kane ka jingrakhe yn don ki jinglehkai ba bunjaid kum shi bynta ban pynpaw ka jingsngewnguh ïa ki nongleit nongwan bad kiba ju don bynta.
Ha kane ka prokram yn kynthup ruh ka jingrwai ïa ka Vande Mataram, ka jingthung dieng, ka jingpeit bniah ïa ka koit ka khiah jong ki nongleit nongwan bad ka jingïakop dro dur na ka bynta ki khynnah.
Kum shi bynta jong kane ka jingrakhe, ka kad liengsuiñ jong ka Shillong kan ithuh ïa ka jingnoh synñiang kaba kordor jong ki nongtrei jong ka da kaba ai burom ïa ki nongpynkhuid bad ki nongtrei kynthei na ka bynta ka jinglehbha ka jingtrei shitom jong ki ïa la ka kam.
Kane ka kad liengsuiñ ïa mynta, ka don jingïadei ban ai jingshakri bad ki nongbah jong ka thaiñ Shatei Lam-Mihngi, nalor ka jingïadei bad ka Delhi, Kolkata bad kane kan pynkhlaiñ ïa ka jingïatylli ha ka thaiñ bad ruh ka pynsuk ruh ïa ka jingleit jingwan jong ki nongleit nongwan.
Kane ka kad liengsuiñ kan ïai bteng ban bud ïa ka jingroi kaba neh lyngba ki jingthmu bapher-bapher, kine ki kynthup ïa ki lad pynneh pynsah ïa ka bording, ka jingpynmih bording na ka sngi, ki rukom bret ïa ki jaboh jabaiñ bad ki jingpynbha ïa ki jingthung.
Ka Yatri Suvidha Diwas ka long ka rynsan kaba kongsan ban ithuh ïa ka jingtreikam jong ka AAI, ka jingïadei bad kiwei ki kad liengsuiñ, ki tnad pahara, ki tnad Sorkar bad baroh kiba don bynta ha kaba pynpoi ïa ki jingshakri ha kad liengsuiñ ha ka kyrdan jong ka pyrthei.
Ka kad liengsuiñ jong ka Shillong ka dang ïai bteng ban pynbha bad ban nang pynkhlaiñ shuh-shuh ïa ka bynta jong ka kum ka khyrdop ba kongsan sha ka Jylla Meghalaya bad kum ka jingpynroi ha ka thaiñ.
