Shillong, Jylliew 14
U Myntri ka tnad pule-puthi ka Jylla, Bah Lahkmen Rymbui u la ong ba “ka pule-puthi ka ïai long ka atiar kaba khlaiñ bor na ka bynta ban pynkupbor bad ban pynkylla ïa ka imlang-sahlang”.
U Bah Rymbui u la ong ïa kane haba kren sha ki samla pule ha ka ‘Prof. Barrister Pakem Academic Awards’ banyngkong eh kaba la pynlong da ka Jaiñtia Students’ Union ha Jowai, West Jaiñtia Hills District Ïa kane ka jingrakhe la pynlong kum ka dak ban burom ïa ka pateng ba la ieh noh shadien jong u Prof. Barrister Pakem (Bam Kwai ha Dwar U Blei), bad la wan ban ïashim bynta lang da u Pro Vice-Chancellor barim ka NEHU, Prof. Henry Lamin, u MDC ka Jowai Central, u Bah Andrew Shullai, ka Dr. Didakamiwan Khonglah, khun jong u Prof. Pakem, ha ryngkat ki kmie ki kpa, ki nongïoh khusnam, bad ki ‘riew paidbah.
Haba kren hadien ka jingbatai bniah halor ki jingnoh synñiang jong u Prof. Pakem sha ka pule-puthi bad ka jingnang-jingstad ka Meghalaya, u Myntri u la ai khublei ïa ka JSU kaba la mih shakhmat bad kane ka khusnam.
U la ñiew ïa ka kum “ka jingai burom kaba biang eh sha uwei na ki ‘riewshemphang ha ka pule-puthi bad nongïohi jngai ba paw ka Meghalaya uba ki kam jong u ki ïai bteng ban ai mynsiem ïa kiba bun pateng.”
“Ka jingnang-jingstad kam dei tang ha ka liang ki ‘mark’ ne ‘degree’,” la ong u Bah Rymbui sha ki samla pule.
“Ka dei ka atiar kaba khlaiñ bor tam na ka bynta ban pynkupbor bad ban wanrah jingkylla ha ka imlang-sahlang. Bteng ïa ka jingpule ha ryngkat ka jingtbit, ka jingaiti lut, ka jingminot, bad ka jinglong hok. Ïa ka jingjop ba shisha la thew ym tang da ki jingjop ha ka jingpule hynrei da ka jinglong, ka jinglong nongïalam, bad ka jingshakri sha ka imlang-sahlang,” u la ong.
Haba ban jur halor ka jingdonkam ban ithuh ïa ka jingtbit, u la ong ba ka jingai burom ïa ki samla pule kiba wan shakhmat “ka pynshlur ïa ki khynnah samla ban long kiba tbit bad ka tei ïa ka kolshor jong ka jingïakhun kaba koit ba khiah bad ka jinghikai ha ka jingim baroh shirta.”
U la bynrap ruh ba “ka lawei jong ka Meghalaya ka shong ha ki jingangnud bad ki jingjop jong ki samla jong ka. Pyndonkam hok ïa kawei-pa-kawei ka lad ka kabu kaba phi don.”
U Myntri u la pynskhem biang ïa ka jingpynleit jingmut jong ka Sorkar Jylla ha ka pule-puthi, da kaba kdew ïa ka jingpynbha ïa ki jingtei, ka jingpynbha ïa ki lad jinghikai, ki sienjam ban pynroi ïa ki sap ki phong, bad ki polisi na ka bynta ka jingpule kaba paka na ka bynta baroh.
U la kyntu ruh ïa ki samla pule ban “long ki nongrahktien jong ka jingkylla kaba bha bad ban synñiang sha ka jingkiew bad roi ka par jong ka Meghalaya.”
U Bah Rymbui u la ïaroh ruh ïa ka bynta jong ki kmie ki kpa bad ki nonghikai, da kaba ong ba ki khusnam ki rakhe ïa ka “jingtreilang kaba kynthup ïa ki khynnah, ki longïing, ki nonghikai, bad ki shlem pule.”
Ka prokram ka la sdang da ka jingkren pdiang sngewbha na u Assistant Secretary ka JSU bad la pynkut da ka jingsam khusnam sha ki samla pule kiba la wan shakhmat.
Nalor kane, ka la don ka jingrwai na ka kynhun ‘Elev Tribe Choir’ kaba la pynshong kun shuh-shuh ïa kane ka jingïalang.
Ki khusnam ki long ka jingpyrshang ban rakhe ïa ka jingtbit ha ka pule-puthi ha ryngkat ka jingpynneh-pynsah ïa ka pateng jong u Prof. Pakem kum u ‘riewshemphang bad u nongtei ïa ka ri bad ka jaidbynriew.
