Shillong, Nailar 16
Ka KSU-EJHDU ha ka Sngi Thohdieng ka la leit ban pynsangeh ïa ka jingtrei ban tei ïa ka jaka mane blei ki kynhun Hindu ha phyllaw ka District Court, Khliehriat kaba don ha syndah bad ka ophis Deputy Commissioner.
“Ka jingleit pynsangeh ka seng mynta ka sngi ka long hadien ba ïoh jingtip ba ïa kane ka jaka mane blei ki shit niam Hindu ki thmu ban phah shna jubor bad rah shadien khyndiat ïa ka jaka mane jong ki kaba ïatyngkhuh bad ka kynroh ka District Court, Khliehriat,” la ong ka kyrwoh na ka seng.
Ka seng ha kane ka sngi ka la pynsangeh shisyndon ïa katei ka jingtrei bad ka la maham ba lada dang ïai pyntrei ïa katei ka kam yn bahkhlieh kiba ai hukum kaei ban jia.
Ka seng mar-mar ka ka thmu ïakynduh ïa ki bor distrik hynrei kam shym la ïoh ban ïakynduh ïa ki.
Na ka liang ka seng ka la ïoh ban pynsngew sha u DC halor kane ka mat lyngba ka ‘phone call’ bad u DC ruh u la pynpaw ka jingsngew kyndit halor kane ka bynta.
Kum ban shu pynkynmaw ba ha ki sngi ba la leit, ka seng ka la ïoh ban ïakren halor kane ka mat bad na ka liang u DC u la kular kan ym don kano-kano ka ban ïaid shakhmat haba ïadei bad katei ka jaka mane blei bad ong ba ïa mynta yn pynneh ïa ka “Status Quo” bad u la pynpaw sha ka seng ba un ai da ka hukum ban pynsangeh shisyndon ïa ka jingthmu ban tei ïa katei ka jaka.
“Ka seng ka la pan ïa ka RTI halor kane ka mat hynrei mynta la ïaid 35 sngi tam bad ym pat ïoh jubab bad wat hadien ba la ujor ïa ka ‘First Appeal’. Ka seng ka buh jingkylli ba balei hap ban pynslem haduh kane – imat ka don kaei-kaei sha lyndet,” la ong ka kyrwoh.
Ka seng ka pynpaw ka jingkyndit ba wat haba la don kata ka ‘Status Quo’ hynrei kine ki shit niam Hindu ki thmu beit ban shna jubor bad klun jubor ïa ka jaka Sorkar (Revenue Land) khlem kheiñ snep ïa ka jingbthah ka Sorkar bad khlem kheiñ snep bad khlem burom satia ïa ka rai ki bor distrik.
Shuh shuh ka seng ka tip ruh lyngba ki tnat syntiat jong ka ba ïa kane ka mat, ka ‘file’ ba dei ban ïaid na u Myntri ba dei peit ka khlem ïaid satia lyngba jong u bad um khlem don jingtip eiei hynrei la shu ïasylla da u DC barim uba lah khmih ïa ka Ri-Bhoi mynta bad katto-katne ngut ki nonglilam bad nong pynbor ban ïoh NOC na ka Dorbar Shnong Khliehriat Pohshnong.
“Ka seng ka pynpaw ba haba ïa ka jaka Sorkar lah shah thombor kumne – kaba kumno pat ka jingïada kan ai sha u paidbah haba shah klun jaka ha ki nongwei,” la ong ka seng.
Na ka liang ka seng kan sa ïakynduh ha ki sngi ban wan ïa u Myntri ba dei peit halor kane ka mat bad ka seng ka maham ruh ba lada ïai bteng kane ka jingleh donbor, ka seng kan hap shim da ka sienjam ba tyngeh.
