Shillong, Nailar 16
Ha ka jingkylla kyndit ha ka saiñ pyrthei ha kane ka Jylla, ar ngut ki MLA ka Congress ki la shah sospon na ka seng haduh hynriew snem namar ka jingkynnoh ba ki la leh ïa ki kam kiba long pyrshah ïa ka seng ha kaba la ïohpdiang ruh ïa ki kaiphod na ki Block Congress Committee bad Frontal Organisation kiba la kdew ba kine ki MLA ki la ïajan bad ka Sorkar MDA.
Kine ar ngut ki MLA ka Congress kiba la shah sospon ki long u MLA ka Congress na Mawhati konstitwensi u Bah Charles Marngar bad u MLA ka Congress na Nongstoiñ konstitwensi, u Bah Gabriel Wahlang.
Ïa ka shithi kaba pyntip sha kitei ar ngut ki MLA ba ki la shah sospon na ka seng haduh hynriew snem la phah da ka General Secretary ka Meghalaya Pradesh Congress Committee (MPCC) ka Kong Wansuk Syiem kaba dei ruh ka MP barim ka Jylla.
Kane ka jingshah sospon jong kitei ar ngut ki MLA ka Congress ka la wan ruh ha ka por ba la ïaid bha ki khubor ba kitei ar ngut ki MLA kin ïasoh noh bad ka National People’s Party (NPP) kaba ïalam ïa ka Sorkar MDA ha kane ka Jylla.
Katkum ki kyndon, ki MLA kiba la shah sospon na ka seng, kim lah ban leit rung sha kano-kano ka seng saiñ pyrthei.
Ka Congress ka don 4 ngut ki MLA ha Ïingdorbar Thawaiñ bad da ka jingshah sospon noh jong kine ar ngut ki MLA, mynta ka don sa tang ar ngut ki MLA kiba kynthup ïa u Bah Ronnie V Lyngdoh uba dei ruh u nongïalam ka Liang Pyrshah bad u MLA ka Congress na Umsning konstitwensi, u Dr Celestine Lyngdoh.
Dang shen ki khubor ki la ïaid bha ba lai ngut ki MLA ka Congress kin mih noh na ka seng ban leit ïasoh bad ka NPP ha shwa ban sdang ka dorbar synrai jong ka Ïingdorbar Thawaiñ ka Jylla.
Hynrei da kane ka jingshah sospon jong kitei MLA ar ngut, ka la buh jingeh ïa ki ban leit rung sha kawei pat ka seng.
