Shillong, Nailar 16
U MLA Congress na Mawhati konstitwensi, Bah Charles Marngar ha ka Sngi Thohdieng u la ong ba u Myntri Rangbah ka Jylla, u Conrad K. Sangma u la kular ba shen yn sa mang noh na bynta ban pynïeng ïa ka C&RD Block bathymmai ha Mawhati.
“Nga la wan ïakynduh ïa u Myntri ka tnad C&RD ha kito ka por, Bah Hamlet Dohling ryngkat ka Synjuk ki Rangbah Shnong jong ka Mawhati, Sonidan Area bad kiwei-kiwei. Ka dei ruh ka jingdawa ha kaba katto-katne ki kynhun hapoh konstitwensi ki la dawa na bynta ka C&RD Block na ka Sorkar bad wan ïakynduh ruh ïa nga,” la ong u Bah Marngar hadien ka jingïakynduh bad u Myntri Rangbah ka Jylla ha ryngkat ki nongïalam napoh konstitwensi.
Haba pynsngew ba ka kynhun ka la wan ïakynduh ïa u Myntri Rangbah halor katei ka jingdawa, u MLA u la pynpaw ka jingsngewkmen ba na ka liang u Myntri Rangbah u la kular ban mang noh ïa kane ka Block thymmai.
“Ki kam ki la ïaid mynta ban mang ïa kane bad u (Myntri Rangbah) la ïathuh ïa ngi bad ba shen hi yn sa pynbna noh ïa kane ka C&RD Block,” u la ong.
U Bah Marngar u la ong ruh ka C&RD Block bathymmai kan pynsuk shi kat dei ïa ki paidbah ha ka leit ka wan da kaba ai nuksa ba naduh Umsiang, ki paidbah kin hap ban wan shaduh Umsning, ha ryngkat ka jingjngai kaba 80 km na bynta ka baibam tymmen, skhim ïing baduk, skhim 100 sngi nalor kiwei-kiwei ki jingdonkam.
“Lada kane ka urlong shisha kumba ngi la ïakren mynta ka sngi bad ngam artatien ba kan urlong na ka jingkren u Myntri Rangbah – kan long ka jingkyrkhu ïa ka konstitwensi hi baroh kawei,” u la ong.
Haba ïadei bad ka surok na Sonidan shaduh Umsiang, u Bah Marngar u la ong ba na ka liang u Myntri Rangbah u la ai ïa ka jubab kaba manbha bad ym slem shuh yn sa ïoh ïa kane ka surok kaba dang sah kumba 40 km.
Halor ki shnong ki bym pat don skul, u MLA u la ong ba u Myntri Rangbah u la ai ka jingkular ba un sa shim ïa ki sienjam ba mardor ban leh eiei noh haba ïadei bad kane ka bynta.
Na ka liang u Bah Marngar u la kyrpad ruh na u Myntri Rangbah ban kyntiew kyrdan noh ïa katto-katne ki Sub-Centre sha ka PHC, ba kynthup ïa ka Sonidan bad Mawrong.
Ha kawei ka liang, u Myntri Rangbah u la ong ba u la pdiang ïa ka jingtyrwa ba ïadei bad ka C&RD Block bad yn sa sdang noh ïa ka kam ban mang na bynta ka C&RD Block bathymmai ha Mawhati khnang ba ki paidbah kin ïoh ka jingshakri kaba kham bha kumjuh ban ïoh bynta ïa ki skhim bapher-bapher ka Sorkar.
“Halor ka surok Sonidan sha Umsiang, nga la kular ba ka song thymmai jong ka ‘World Bank’ bad ha kane ka song nga la kular ba kane ka surok hapoh ka jingmang ka ‘World Bank’ yn sa shimkhia – ka la don lypa ha ka thup bad la pynkhreh ïa ka DPR,” la ong u Sangma.
Shuh shuh halor ki shnong ki bym don skul, u Myntri Rangbah u la kular ïa ka kynhun hapoh ka jingïalam u MLA ba lyngba ka CMSDF un sa mang pisa khnang ban tei ïa kine ki ïing skul.
