Khliehriat, Nailar 16
Da kaba kynnoh ïa ka Jaiñtia Hills Autonomous District Council (JHADC) halor ka jingai No Objection Certificate (NOC) ïa ka M/s Meghatop Cement Private Limited (MCPL) khlem ka jingmynjur jong ka Dorbar Elaka Narpuh, u nongsaid aiñ jong ka East Jaiñtia Hills District, u Bah Kynjaimon Amse u la dawa ban pyndam noh ïa ka NOC bad byrngem ruh ban shim ïa ka lynti jong ka aiñ ban weng noh ïa ka NOC ba la ai da ka JHADC.
Ha ka shithi ba la phah sha u Chief Forest Officer, Jaiñtia Hills Autonomous District Council (JHADC) ha ka Sngi Thohdieng, u Bah Amse u la ong ba la ai NOC da ka JHADC sha katei ka Company katkum ka vide No. JHADC/FOR/39/2022 Dated Jowai the 3rd July 2023 na ka bynta ban buh ïa ka 3 ‘million’ Ton 50 MW Captive Power Plant WHRS system bad ki Captives Mines na ka bynta ka Cement Plant ha Wahïajer, Elaka Narpuh, East Jaiñtia Hills District, kaba long pyrshah ïa ka rukom treikam kaba dei katkum ka aiñ.
U la ong ruh ba ïa kane ka NOC la ai sha katei ka kompani wat la ka JHADC kam lah bad kan ym ai NOC ïa kino-kino ki kynhun na ka bynta ban seng karkhana hapoh ka Elaka Narpuh khlem ka NOC na ka Dorbar Elaka Narpuh.
U Bah Amse u la ong ba katkum ki jubab da ka JHADC halor ki jingkylli jong u ba la pan lyngba ka RTI, u sngewthuh ba la ïoh NOC da ka MCPL na ka Dorbar Elaka/ Dalloi, Elaka Narpuh na ka bynta ka M/s Megha Top Cement Private Ltd bad hadien kata ka JHADC ka la ai ruh ïa ka NOC ïa ka M/s Megha Top Cement Private Ltd ban buh ïa ka karkhana dewbilat ha Wahïajer, Elaka Narpuh.
Haba pyntip ba ka ‘Provisional NOC’ ka dei kaba la ai da u Dolloi, Elaka Narpuh ha ka 3 tarik Naiwieng 2022, u Bah Amse u la ong ba kane ka NOC ka thoh kumne “Kane ka long ban pynshisha ba ka No Objection Certificate ban buh ïa ka Cement Plant da ka Meghatop Cement Private Limited ha ka shnong Narpuh ka dang don hapoh ka jingpyrkhat da ka Dorbar ka Elaka Narpuh. Nga pyntikna ba ïa ka NOC yn sa ai ynda la mynjur da ka Dorbar Elaka ïa ka rai.”
U la pynshong nongrim ba ïa ka ‘Provisional NOC’ ym lah ban kheiñ kum ka NOC namar ba ka dei tang ka jingpyntikna na u Dolloi bad ym shym la kdew ba ka Dorbar Elaka Narpuh ne u Dolloi ula ai NOC ïa ka MCPL na ka bynta ban buh karkhana dewbilat hapoh ka Elaka Narpuh.
U la buh jingkylli ruh ba kumno ka JHADC ka lah ban kheiñ ïa kane ka kot kum ka NOC bad ka la ïaid ruh shakhmat ban ai NOC ia ka MCPL. U la bynrap ruh ba ka M/s Megha Top Cement Private Ltd ka la ïalam bakla ïa ka JHADC lane ka tnad Khlaw jong ka JHADC ka la leh bym suidñiew ïa kane ka kot ba la pynmih da u Dolloi Elaka Narpuh.
Haba pynkynmaw ba ka JHADC ka dei ban ïada ïa ka hok jong ki trai ri trai muluk bad ka riti dustur ym na ka bynta ka bha ka miat jong ki kynhun sengkam bad ai NOC khlem da pyrkhat ïa ka bha ka miat jong ki paidbah, u Amse u la pynskhem da kaba ong, “Ka long ka dustur bad ruh ka aiñ ha ka Elaka Narpuh ba ym lah ban ai NOC ïa kano-kano ka kynhun treiakm bad ba ym don mano-mano ba lah ban seng karkhana ha Elaka Narpuh khlem ka jingmynjur jong ka Dorbar Elaka Narpuh kaba ha kane ka khep ka JHADC ka la ai NOC be-aiñ.”
U la ong ruh ka NOC kaba la ai da ka JHADC na ka bynta ka M/s Megha Top Cement Private Ltd ka long kaba be-aiñ.
