Nongstoiñ, Nailar:
Ka Hynñiewtrep Youths’ Council (HYC) Nongstoiñ Circle ha ka Sngi Balang ka la leit ban kyrpad ïa u Branch Manager jong ka State Bank of India (SBI) Nongstoiñ Branch ban buh ïa ki Automated Teller Machine (ATM) bad Cash Deposit Machine (CDM).
Ïa kane ka jingleit ïakynduh la lamkhmat da u samla Redyfernandy Sun, President bad u samla Iainehskhem Ryntathiang, General Secretary bad la synran lang da u samla Lumlang Kharsyiemlieh, President ka HYC West Khasi Hills District.
Ki nongïalam ka HYC ki la pynpaw ba katto-katne ki mat kaba ka seng ka la leit ïakynduh ka long ban kham pynbun ki kor ATM bad Cash Deposit Machine hapoh jong ka Nongstoiñ na ka bynta ban pynsuk ïa u paidbah jong ka dong ka thaiñ.
La kyrpad ruh ban buh ïa ka jaka sei pisa (ATM) hajan ki hospital kiba don hapoh ka thaiñ Nongstoiñ, kata ka Civil Nongstoiñ kaba don ha Mawkadiang bad ka St Joseph’s Hospital kaba don ha Tiehsaw khnang ba kan pynsuk ïa ki briew kiba leit sumar ha kine ki jaka.
Namar kata, ka HYC ka la kyntu ïa u Branch Manager jong katei ka Bank ba un shimkhia na ka bynta ka jingbha bad myntoi jong ki paidbah.
La ïathuh ruh ba na ka liang jong u Branch Manager u la kular ban shimkhia ban ïakren ha Head Office na ka bynta ka jingmyntoi jong ki paidbah.
