Shillong, Nailar:
Ka Hynñiewtrep Youths’ Council (HYC) Sengkmie ka la dawa ïa baroh ki tnad treikam ka Sorkar India kynthup ïa ka State Bank of India (SBI) ban bud ryntih ïa ka jingbthah ba la pynmih da ka tnad Personnel Pubic Grievances & Pensions ka Sorkar Pdeng ban bhah 44% ïa ki kam kiba hap ha ka thup Group ‘C’ bad ‘D’ na bynta ki trai-ri trai-muluk napoh ka Jylla.
Ka seng ka la pynsngew ïa katei ka jingdawa hadien ka jingïakynduh bad u Deputy General Manager (DGM), Administrative Block jong ka SBI ba khmih ïa ka Jylla ha ka Sngi Balang.
Haba kren sha ki lad pathai khubor, u President ka HYC, Sengkmie, Bah Roy Kupar Synrem u la ïathuh ba ka seng ka la ïoh jingtip ba ka SBI lyngba ka Head Office ha Mumbai ka la khot aplikeshon na bynta 77 tylli ki kam (Junior Associates) kiba lait ha ki shnat treikam bapher-bapher jong ka SBI.
“Na kine ki 77 tylli kiba dei na bynta ka Jylla, 33 tylli, la bhah na bynta ki ST bad kiwei-kiwei bad 34 pat ka dei na bynta ki ‘General’, 8 tylli na bynta ki EWS bad SC,” u la ong.
Ha kajuh ka por, u Bah Synrem u la pynkynmaw ba ka don ka jingbthah lyngba ka Office Memorandum (OM) jong ka tnad Personnel Public Grievances & Pensions ha u snem 2005, 2007 bad 2022 ba baroh ki shnat treikam jong ka Sorkar India ki dei ban bhah 44% na bynta ki trai-ri – kata ki nongshong shnong jong kito ki Jylla kiba wan na ka jaidbynriew ‘riewlum ne ki ST haba phai sha ki kam kiba hap hapoh ka thup Group ‘C’ bad ‘D’.
Haba kdew ba ka kam ba lait halor ka ‘Junior Associates’ ka hap ha ka thup Group ‘C’, u la ong ba ka jingpynbna ba la pynmih da ka SBI ha u 2023, ka ong ba na ka 77 tylli ki kam, 33 tylli la bhah na bynta ki ST jong ka Jylla.
“Don kiba pyntip sha ngi ba na kita ki 33 tylli ki kam, ki don tang kumba 3-4 ngut ki khynnah Khasi kiba la ‘pass’ ïa kane ka eksamin bad kiba la shah thung. Lada 3 ngut ki dei ki khynnah Khasi kiba shah jied na ka 33, kata 30 ngut pat kin dei ki ST na kiwei pat ki Jylla – ki mut ban thung ïa ki ST na kiwei pat ki Jylla ban pyndap ïa kane ka 33,” la ong utei u nongïalam.
Na ka liang jong u, u la ong ba nalor ka OM jong u snem 2005, 2007, 2022 kumjuh ki rai bapher-bapher jong ka ïingbishar ba hakhliehduh ka ri – dang ha u 2018, ka ïingbishar ba hakhliehduh ka ri ka dang rai ba u ST ne SC na kawei pat ka Jylla (State A) um lah ban wan kam ïa ka bhah jong u ST ne SC jong kawei pat ka Jylla (State B).
Haba pynsngew ba ka SBI ka lah ban wanrah da kita ki ST kiba nabar ban pyndap ïa kitei ki kam, u Bah Synrem u la ong ka seng ka la ai jingthoh sha u DGM ban pan jingshai na u la kata ka jingsngew jong ka seng ka dei ne em.
“Na ka liang u DGM, u la pyntip sha ngi ba kumba ka long mynta, ma u ruh um tip tikna naba ïa ka jingthung kam la leh da ka Head Office na Mumbai bad ïa kiba la shah jied la shu phah wan hangne bad ai ïa ka kaiphod jingpynïasoh kam,” u la ong.
Shuh shuh u la bynrap ba u DGM un sa ai da ka jingthoh sha ka HYC ban pynshai halor katei ka nongrim kumjuh halor ka jingdawa ka seng.
“Ka jingdawa jong ngi ka long ba ka SBI bad baroh ki shnat treikam ka Sorkar India ki dei ban bud ryntih ïa ka jingbthah kaba la ai da ka tnad Personnel bad kumjuh ïa ka rai jong ka ïingbishar ba hakhlieh duh ka ri kaba la shim na kawei ka por sha kawei ka por,” u la ong da kaba bynrap ba ka seng ka la ai por 5 sngi ïa ka SBI ban jubab halor katei ka bynta lym kumta kam banse ban shim ïa ki sienjam jingïakhih.
