Mawkyrwat, Nailar 16
5 ngut ki paidbah ki la mynsaw katba 2 ngut napdeng kitei ki la mynsaw jur hadien ba ki la shah siat ha ka janmiet jong ka 14 tarik u Nailar 2024 hajan ka shnong Nongdiloiñ, South West Khasi Hills District..
Kitei kiba mynsaw ki long u Banteilang Paliar (16 snem) na ka Sshnong Mawpat, u Jim Paliar (36 snem) na ka shnong Mawpat, Justarwell Paliar (23 snem) na ka shnong Nongdiloiñ, Pyndapjingkyrmen Paliar (21 snem) na ka shnong Demnar bad uwei u bym pat tip kyrteng.
Katkum ki tyllong khubor ba la ïoh lum, la ïathuh ba katei ka jingjia ka la mih na ka kynrum-kynram naduh ka por mynsngi ha Ïew Umdohlun ha kaba ka don ka jingïaknieh nongïalam jong ka Kur Paliar bad ïa ka jinglum bai musur.
Shuh shuh ki tyllong khubor na ki pulit la ïathuh ba ha 14 tarik u Nailar 2024 ha ka por kumba 2 baje nohphai sngi, u Bah Phaibor Paliar uba dei u Acting Lyngdoh jong ka Kur Paliar, Nobosohphoh Syiemship ryngkat ki bahaïing hasem ki la leit donkam sha Mawkyrwat bad ynda ki la mut ban wanphai sha shnong, ha ka por kumba 7:20 janmiet hadien ba ki la ïaid lyngba ïa ka Demnar mar pyrshah ïa u Lum Kulai Lum Sngun 5 km shwa ban poi sha Nongdiloiñ ha ka surok Nongstoiñ Wahkaji, kumba 7 haduh 8 tylli ki kali ha ryngkat kawei ka Mini bos ki la pyrshang ban pynsangeh ïa ki bad ki la kawang maw ïa ka kali jong u, ka Bolero Camper kaba don ïa u nombor ML 07 C – 1403 bad namar ka jingtieng la ïathuh ba um shym la sangeh bad u la ïaid beit sha la ka shnong bad ha lynti u la pyntip sha ki pulit shaphang katei ka jingjia.
Ki tyllong khubor na ki pulit ki ïathuh ruh ba hadien kumba 20 minit eiei, ki paidbhur kumba 100 ngut eiei kiba la bitar bha ki la leit sha ka jaka sah jong u ha Nongdiloiñ bad ki la sdang ban kawang maw ïa ka ïing bad pynpait ïa ki ïit. Ki la pyrshang ruh ban rung jubor shapoh ïing da kaba tied ïa ki jingkhang ryngkat ki wait bad ki tiar pynmynsaw.
La ïathuh ruh ba kitei ki paidbhur ki la byrngem ban pynïap ïa baroh ki briew kiba don hapoh ïing. Dei ha kane ka por ba u Bah Phaibor Khreslan Lyngkhoi u la sei ïa ka suloi kum shi bynta ban ïada ïa la ka ïing ka sem bad ïa ki jingdon jingem u la siat 4 kuli na ka suloi jong u ban pyntieng ïa ki paidbhur.
Hadien ka jingsiat la iathuh ba ki paidbah ki la phet sha jngai hynrei hadien ki la bteng ban kawang maw biang ïa katei ka ïing bad tang mar ïa poi ki Pulit la ïathuh ba kitei ki paidbhur ki la phet krad noh na katei ka jaka.
Napdeng ki kynhun runar la lah ban ithuh tang 3 haduh 4 ngut. Ki tyllong khubor na ki pulit ka Markyrwat ki ïathuh ruh ba ka daw jong katei ka jingjia ka long lehse ka jingïaleh pyrshah hapdeng ki nongïalam Kur bad ki nongpynïaid jong ka Ïew Umdohlun.
