Shillong, Nailar 16
Kawei ka nongshong shnong ha West Garo Hills ka la ujor sha ki pulit bad pyntip ba ha ka 21 tarik Naitung, 2024, ka la ïa pynïadei paralok bad uwei u briew uba la ai kyrteng kum u ‘Atchirak T Sangma’ lyngba ka rynsan ‘Facebook’.
Ha ka jingujor, la pyntip ruh ba utei u briew u la pynithuh ïalade ba u dei u doktor uba trei ha Tura Civil Hospital, bad u la tyrwa kam ruh ïa ka. Nalorkata, katei ka nongshong shnong ka la phah pisa sha u kaba la kot sha ka T. 15,000, hynrei ynda la hadien, ka sa sngewthuh ba ka la shah shukor.
Sa ha kawei pat ka jingjia, ki pulit ki la pyntip ba kawei ka nongshong shnong ha West Garo Hills ka la ai da ka jingujor pyrshah ïa uwei u briew ïa uba la tip kyrteng kum u Ashraful Sk, uba dei u trai/nongpynïaid jong kawei ka CSP, halor ka jingkynnoh ba u la sei T. 52,000 na ka ‘Bank Account’ jong ka khlem da ai jingbit ma ka.
Shuh shuh ki pulit ki la ïathuh ba uwei u briew ïa uba la tip kyrteng kum u Dheeraj Singh Chauhan u la ujor ba ha ka 12 tarik Nailar ha ka por kumba 7:30 janmiet, ki runar ki bym lah ban ithuh ki la tuh ïa ki mar ki mata ba pyndonkam ban shna jingshna bad kiba shongdor kumba T. 3.4 lak na kawei ka jaka kaba don ha Phulbari, West Garo Hills.
