Shillong, Nailar 16
U Myntri Rangbah ka Jylla, u Conrad K. Sangma u la phah ïa ka jingsngewlem sha ki bahaïing bahasem jong u Myntri Rangbah barim ka Jylla, u Salseng C. Marak uba la khlad noh ha ka step Sngi Thohdieng ha Tura Civil Hospital namar ka jingshitom kaba la ban la katto-katne por ïa u.
“Ngi la ïohsngew ïa ka khubor mynta ka sngi halor ka jingkhlad noh u Myntri Rangbah barim ka Jylla, u Salseng C. Marak bad kane ka khubor ka long kum ka jingkyndit bad ngi sngewsih kthang hadien ba ngi ïohsngew ïa ka,” la ong u Sangma. U la ong ruh ba ka jingkhlad noh u Marak ka dei ka jingduh kaba khraw ïa ki dkhot ka longïing, ki paid nong kyrshan jong u bad ka jingduhnong kaba khraw ïa ka Jylla baroh kawei. “U Salseng u la shakri pura na bynta 5 snem kum u Myntri Rangbah ka Jylla hynrei nalor kane, u la don ruh ha ki kyrdan bapher-bapher ba u la shakri ïa ki paidbah jong ka konstitwensi bad ka Jylla kumjuh,” u la ong.
Ha kajuh ka por, u la ong ba u Marak u la synñiang shi kat dei ha kiba bun ki liang sha ki paidbah nongshong shnong bad ka Jylla baroh kawei.
“Ha kane ka por, nga kwah pynpaw ïa ka jingsngewlem sha baroh ki dkhot ka longïing bad duwai ba u Nongbuh Nongthaw un don ryngkat bad ki ha kum kane ka por lem bad ki paid nongkyrshan halor kane ka jingduhnoh ïa u,” la ong u Myntri Rangbah. Shuh shuh u la bynrap, “Nga duwai ruh ha u Nongbuh Nongthaw ba un ai ïa ka mynsiem jong u ïa ka jingjahthait ka bymjukut.”
