Shillong, Nailar 16
Ka Joint Action Committee (JAC) jong kiba tih maw tih shyiap bad kiba bylla na East Khasi Hills district ka la pynpaw ba kim pyrshah ïa ki kyndon kiba ka Sorkar Jylla ka la shna ha u snem 2016 hadien ba la pynmih hukum ka Meghalaya High Court ha kaba ïadei bad ka jingtih maw tih shyiap, namar ki don tang katto-katne ki kyndon kiba long ka jingkhanglad ïa ki briew kiba donbynta ban trei ïa kane ka kam.
Haba kren sha ki lad pathai khubor ha ka Sngi Thohdieng, u General Secretary ka Joint Action Committee, u Bah Devinson Pyngrope u la ong ba na ka liang ka kynhun kan lum da ka jingïalang ha Lad Nongkrem ha ka 19 tarik Nailar 2024 ha ka por 11 baje mynstep ban ïakren lang bad baroh kiba dei ki trai par maw par shyiap, ki trai jong ki karkhana tylliat maw kumjuh ruh ki nongbylla bad nongñiah kali.
Halor ka jingshna ka Sorkar ïa ki kyndon hadien ba la pynmih hukum ka Meghalaya High Court, u la ong ba kim pyrshah ïa ki kyndon kiba ka Sorkar ka la shna namar ym baroh ki kyndon ki dei kiba khanglad hynrei dei tang katto-katne ki kyndon kiba long ka jingeh kum ka jingjngai jong ka par maw ne par shyiap na ka wah, bad ka jingheh jong ki par maw par shyiap na ka bynta ban ai jingbit ban tih.
U la ong ba kiba bun ki jaka par maw par shyiap kiba pyndonkam ban tih mynta ki dei kiba rit bad kim ïahap katkum kita ki kyndon kiba la shna da ka Sorkar.
Kumta u la khot la wer ïa baroh ban wan sha katei ka jingïalang ban ïakren lang bad shim lang ïa ka rai kumno ban leh.
U la ong ba kum ka kynhun, kan sa pynkhreh ïa ka jingthoh sha ka Sorkar ban dawa pynbeit noh ïa ki kyndon kiba buh jingeh ïa kiba ju tih maw tih shyiap tang kaba rit eh.
Halor ka jingshah ktah ki um ki wah haba jur ka jingtih maw tih shyiap khlem da pyrkhat ïa ka mei mariang, na ka liang ka kynhun ka kubur ba ka long kaba kongsan ban sumar ïa ki tyllong um bad ki wah ym ban leh pathar namar ka um ka long kaba donkam tam ha ka jingim briew.
Kumta ka kynhun ka kyrshan ïa ka Sorkar ha kaba ïadei bad ka jingsumar ïa ki wah. Na ka liang jong ki ruh ki la ju don lypa ka jingpyrkhat bad ki la ju ïakren para ba ïa tih maw tih shyiap ban nym leh pathar namar ka um ka long kaba kongsan haduh katta-katta.
