Jowai, Nailar 18
Ka Dorbar Shnong Mukroh Pyllun ha ka 17 tarik Nailar ka la ai da ka dorkhast ha u MP ka Shillong Parliamentary konstitwensi, u Dr. Ricky A.J. Syngkon ban pynpaw ïa ka jingeh ka shnong Mukroh kaba don ha khappud Assam-Meghalaya bad ka jingshah pyndik ha ki briew Sorkar ka Assam.
Ha ka dorkhast kaba la ai da u Waheh Shnong, Dorbar Shnong Mukroh Pyllun, Bah Kitlang Maskut bad Secretary Dorbar Sh-nong Mukroh Pyllun, u Bah Precious Sten kaba la aiti ha u MP ka Shillong, ka Dorbar Shnong Mukroh Pyllun ka kyntu ïa u MP ban shimkhia ban peit ïa ka kam pynbeit pud bad ka Assam bad ban shna Border Police Out Post bad ban pynïoh Community Hall bad ka ophis jong ka Dorbar Shnong ban suk haba pynlong ïa kino-kino ki jingïalang.
“Ka shnong jong ngi ka dei kawei na ki shnong ha Meghalaya kaba mad shibun ki jingeh ha kaba ïadei bad ki kam ka-jia khappud bad ka Assam”, la ong ka dorkhast.
“Kumban shu pynkynmaw ïa ka jingjia kaba sngewsih kthang bad kaba ym lah shuh ban klet kaba la jia haka 22 tarik Naiwieng 2022 ha kaba ngi la duh ei ia ki mynsiem ba lui-lui jong ki san (5) ngut ki nongshong shnong ha ki kuli jong ka Assam bad haduh mynta ka jingbishar halor kane ka jingjia ka dang jar-jar. Te kumta, ngi kyrpad ba phin sngewbha ban ïakren halor kane, khnang ba kito ki san ngut bad ka shnong kin ïoh ïa ka hok,” ong ka dorkhast.
“Ngi kwah ruh ban kdew ba katkum ka map jong ka Dorbar Shnong ba la ai da ka Jaiñtia Hills Autonomous District Council, Meghalaya, u laiñ khappud jong ka shnong ka dei haduh Mootha Siangkwai lane Umsapar kaba don haduh 8 km napdeng jong ka shnong (Phlong) bad ha shilynter kine ki jaka ki nongshong shnong ki ïa rep ïa riang bad bun ki pyntha kba jong ki nongshong shnong ki don ha kine ki jaka bad baroh kine ki jaka ki dei jong ki nongshong shnong,” ka la ong.
Katei ka dorkhast ka ong ruh ba haduh mynta ki briew jong ka Sorkar Assam lyngba ki pulit jong ka kiba don ha Mookoilum, Kherini bad ki Forest Guard ba don ha ka ktem jong ki ba la shna jubor da ka Assam ha Khliehsanaro kaba dei ka jaka hapoh u pud jong ka shnong ki pyndik bad pyntieng pynsmiej ïa ki nongshong shnong kiba leit trei bad rep sha kine ki jaka bad haman ba ki nongrep ki kit ïa ka dieng ïap ban thang dieng bad ki phlang ban tap ïing, kine ki briew jong ka Assam ki khang bad ki shait daiñ da ka kuna ka baheh.
Shuh shuh ka Dorbar Shnong Mukroh Pyllun ka la kdew ruh ba watla ka Sorkar Jylla ka la kular ban buh ïa ka BOP ha Mukroh hynrei haduh mynta kam don kino-kino ki dak ki shin ban pynïeng ïa ka BOP.
